وفاقی وزیر اطلاعات عطا تارڑ نے فیض حمید کی سزا کو تاریخی فیصلہ قرار دیتے ہوئے کہا ہے کہ یہ حق اور سچ کی فتح ہے۔ جیو نیوز سے گفتگو کرتے ہوئے عطا تارڑ نے کہا کہ پاک فوج کا سسٹم بہت مضبوط ہے اور اس کے قانونی میکنزم بھی مضبوط ہیں۔ انہوں نے کہا کہ اس معاملے پر ایک لمبے عرصے تک شواہد پیش کیے جاتے رہے اور گواہوں کے بیانات قلمبند کیے جاتے رہے۔ انہوں نے الزام لگایا کہ فیض حمید نے بطور پی ٹی آئی کے سیاسی مشیر ملک میں سازشیں کیں اور آج کا فیصلہ تاریخی ہے۔
انہوں نے کہا کہ فیض حمید نے ریڈ لائن کراس کی۔ انہوں نے بتایا کہ ریٹائرمنٹ کے بعد جب سیاسی سرگرمیوں پر قدغن تھی، تو وہ پی ٹی آئی کے سیاسی مشیر بن گئے اور انہوں نے پارٹی کی پوری سیاسی سپورٹ کی۔
وفاقی وزیر کا کہنا تھا کہ نو مئی جیسے واقعات میں انتشار پھیلانا اور ریاست کے خلاف بغاوت کرنا ان پر ثابت ہوا ہے۔ انہوں نے ہاؤسنگ سوسائٹی کے کیس کا حوالہ دیتے ہوئے کہا کہ ناجائز اختیارات اپنی پوزیشن کا غلط استعمال کرنا یہ سب ناقابل تردید ہے۔ انہوں نے کہا کہ یہ لینڈ مارک فیصلہ ہے اور اس سے قانون و انصاف کے نظام کو بہت تقویت ملی ہے۔
عطا تارڑ نے مزید کہا کہ یہ ایک فیئر ٹرائل ہوا اور انہیں بھرپور موقع دیا گیا کہ وہ اپنے دفاع میں ثبوت اور گواہان پیش کریں۔ انہوں نے کہا کہ سیاسی معاملات کی بھی تحقیق ہو رہی ہے اور سب چیزیں فیض حمید پر ثابت ہو چکی ہیں۔ انہوں نے کہا کہ ان کی سیاسی وابستگی بہت زیادہ تھی اور بطور پی ٹی آئی سیاسی مشیر انہوں نے ملک میں آگے بڑھ کر سازشیں کیں اور انتشار پھیلایا۔
ان کا کہنا تھا کہ نو مئی ایک بہت سنگین معاملہ ہے اور اس پر تحقیقات ہوں گی۔ انہوں نے کہا کہ ان کی سیاسی اسسٹنٹ کی سنگین صورت حال کی تحقیقات کی جا رہی ہیں اور وہ ریاست کی رٹ کمزور کرنے کی کوشش کر رہے تھے۔
