وزیراعلیٰ پنجاب مریم نواز شریف نے دورہ برازیل سے واپسی پر امن و امان کے لیے مزید ہائی الرٹ رہنے کا حکم دے دیا۔ دہشت گرد، انتہا پسند اور نفرت کے نیٹ ورک پنجاب میں بے بس دکھائی دیے۔ پنجاب حکومت نے انتہا پسندوں اور دہشت گرد نیٹ ورک کے مالیاتی اور جنگی انفراسٹرکچر کو ختم کر دیا ہے۔ ٹی ایل پی کے ٹھکانوں سے جدید ترین اسلحہ، ہزاروں گولیاں، بلٹ پروف جیکٹس اور جنگی ساز و سامان برآمد ہوئے۔ پنجاب حکومت نے احتجاج کے نام پر نفرت اور فتنہ پھیلانے والی فنڈنگ بھی روک دی۔ کالعدم انتہا پسند جماعت کے عہدے داروں کے 23 ارب 40 کروڑ کے اثاثے منجمد کر دیے گئے جبکہ 92 بینک اکاؤنٹس اور جاز کیش سمیت تمام ڈیجیٹل اکاؤنٹس جام کر دیے گئے۔ کالعدم جماعت کے 9 فنانسرز کے خلاف بھی مقدمات درج کیے گئے ہیں۔
ثانیہ زہرا قتل کیس: مقتولہ کے شوہر کو سزائے موت سنادی گئی
وزیراعلیٰ مریم نواز شریف کی زیرِ صدارت امن و امان پر غیرمعمولی اجلاس منعقد ہوا۔ اجلاس میں پنجاب حکومت نے باقی صوبوں میں بھی کالعدم انتہا پسند جماعت کے خلاف پنجاب جیسی یکساں کارروائی کے لیے وفاقی حکومت سے درخواست کرنے کا فیصلہ کیا۔ وزیر اعلیٰ مریم نواز شریف نے کومبنگ آپریشن مستقل جاری رکھنے کا حکم دیا۔ سوشل میڈیا پر ملکی سلامتی کے خلاف مواد شئیر کرنے پر 31 مقدمات درج کیے جا چکے ہیں۔
بریفنگ میں بتایا گیا کہ پنجاب میں مساجد اور آئمہ کرام کے لیے 61 ہزار سے زائد فارم تقسیم کیے گئے ہیں، جبکہ 50 ہزار سے زائد آئمہ کرام نے خود اپنی رجسٹریشن کر کے امن اور قانون کے ساتھ تعلق مضبوط کیا ہے۔ پنجاب میں آئمہ کرام کی 82 فیصد رجسٹریشن مکمل ہو چکی ہے، جس پر وزیر اعلیٰ نے اطمینان کا اظہار کیا۔ پنجاب میں امن کی مضبوطی کے لیے پانچ بڑے وفاق المدارس نے مساجد اور آئمہ کرام کی رجسٹریشن پر اتفاق رائے کیا۔ وزیر اعلیٰ مریم نواز شریف نے آئمہ کرام کو پریشان نہ کرنے اور احترام کو ملحوظ خاطر رکھنے کی ہدایت کی اور کہا کہ آئمہ کرام نماز پڑھاتے ہیں اور نہیں چاہتے کہ وہ چندے کے لیے ہاتھ پھیلائیں۔ پنجاب کے کسی شہر میں وال چاکنگ برداشت نہیں کی جائے گی۔
پنجاب حکومت نے تمام ڈپٹی کمشنرز کو صوبہ بھر میں وال چاکنگ پر مکمل پابندی کے مستقل نفاذ کے لیے موثر اقدامات جاری رکھنے کی ہدایت کی۔ حکومت نے عوام کی جانب سے انتہاپسندی اور فتنہ انگیزی کو یکسر مسترد کرنے پر بھی اطمینان کا اظہار کیا۔ اجلاس میں پنجاب میں اسلحہ کے حوالے سے ایس او پیز واضح کرنے کا اصولی فیصلہ بھی کیا گیا۔
