آسٹریا نے بجلی کے کھمبوں کو فن، فطرت اور انجینئرنگ کے حسین امتزاج میں ڈھالنے کا ایک منفرد منصوبہ شروع کیا ہے، جس کے تحت اب ملک میں روایتی بجلی کے کھمبوں کی جگہ دیوہیکل پرندوں اور جانوروں کی شکل میں بنائے گئے مجسماتی کھمبے نصب کیے جائیں گے۔
ایران ایئر نے مشہد-زاہدان-کوئٹہ پرواز کا آغاز کردیا
اس منصوبے کو ’’دی آسٹرین پاور جائنٹس‘‘ کا نام دیا گیا ہے، جس کا مقصد بجلی کی ترسیل کے نظام کو فطری ماحول کے ساتھ ہم آہنگ بنانا ہے۔ یہ منصوبہ آسٹریا پاور گرڈ (APG) اور میسل آرکیٹیکٹس کے اشتراک سے تیار کیا جا رہا ہے۔ ابتدائی طور پر دو مجسماتی کھمبے بنائے گئے ہیں، جن میں ایک پرندہ اسٹارک کی شکل میں اور دوسرا بارہ سنگھا ہرن سٹیگ کے انداز میں تیار کیا گیا ہے۔
اسٹارک برجن لینڈ کے علاقے میں ہر سال آنے والے مہاجر پرندوں کی علامت سمجھا جاتا ہے، جب کہ سٹیگ زیریں آسٹریا کے سرسبز جنگلات کی نمائندگی کرتا ہے۔ دونوں مجسماتی کھمبے فی الحال آزمائشی مرحلے میں ہیں تاکہ ان کی ساختی مضبوطی اور برقی حفاظت کو پرکھا جا سکے۔
یہ دلچسپ ڈیزائن سنگاپور کے ریڈ ڈاٹ میوزیم میں اکتوبر 2026 تک نمائش کے لیے رکھا گیا ہے اور اسے ریڈ ڈاٹ ڈیزائن ایوارڈ 2025 سے بھی نوازا گیا ہے۔ اس منصوبے کا مقصد بجلی کے نیٹ ورک کو ماحول دوست بنانا، مقامی سیاحت کو فروغ دینا اور عوام میں توانائی منصوبوں کے لیے قبولیت بڑھانا ہے۔
آسٹریا پاور گرڈ کے مطابق یہ فطرت سے متاثر ڈیزائن مستقبل میں ماحول دوست انفرااسٹرکچر کی علامت بنے گا اور خطے کی معیشت و سیاحت دونوں کو مضبوط کرے گا۔ آئندہ مرحلے میں منصوبہ سازوں کا ارادہ ہے کہ آسٹریا کی تمام نو ریاستوں کے لیے مختلف جانوروں پر مبنی کھمبے تیار کیے جائیں تاکہ ہر علاقے کی ثقافت اور قدرتی شناخت اجاگر ہو۔
یہ منفرد منصوبہ اس تصور کے ساتھ پیش کیا گیا ہے کہ مستقبل میں یہ ’’جانور نما کھمبے‘‘ نہ صرف بجلی کی فراہمی کا ذریعہ ہوں گے بلکہ فن اور سیاحت کا نیا نشان بھی بن جائیں گے۔
