سپریم کرٹ؛ شبلی فراز کی نشست پر سینیٹ الیکشن کا شیڈول معطل کرنے کی استدعا مسترد

اسلام آباد: سپریم کورٹ نے پی ٹی آئی رہنما شبلی فراز کی نشست پر سینیٹ الیکشن کا شیڈول معطل کرنے کی درخواست مسترد کر دی۔

جسٹس امین الدین خان کی سربراہی میں پانچ رکنی آئینی بینچ نے درخواست پر سماعت کی۔ عدالت نے پشاور ہائیکورٹ کا فیصلہ کالعدم قرار دیتے ہوئے شبلی فراز کی اپیل نمٹا دی اور ہائیکورٹ کو زیر التواء درخواست پر فیصلہ کرنے کی ہدایت دی۔

کیا موٹرز نے “+Stonic EX” کے لیے بغیر انٹرسٹ اقساط کی اسکیم متعارف کرادی

عدالت نے شبلی فراز کی خالی نشست پر سینیٹ الیکشن روکنے کی استدعا بھی مسترد کرتے ہوئے کہا کہ عدالت سینیٹ الیکشن کے عمل میں مداخلت نہیں کرے گی۔

دوران سماعت بیرسٹر گوہر نے کہا کہ کل شبلی فراز کی نشست پر الیکشن ہونا ہے، اس لیے شیڈول معطل کیا جائے۔ اس پر جسٹس حسن اظہر رضوی نے ریمارکس دیے کہ جب آپ نے امیدوار نامزد کر دیا تو حکم امتناع کیوں مانگ رہے ہیں۔ جسٹس جمال خان مندوخیل نے کہا کہ امیدوار نامزد کرنا تو مجبوری تھی۔

جسٹس حسن اظہر رضوی نے بیرسٹر گوہر سے مکالمہ کرتے ہوئے کہا کہ آپ خود تحریک انصاف کے چیئرمین ہیں، جب امیدوار نامزد کر چکے ہیں تو اب الیکشن رکوانے کی کیا ضرورت ہے۔

بیرسٹر گوہر نے بتایا کہ صرف ایک سیٹ پر الیکشن ہے، اور ہمیں دو آئینی عہدوں سے بے آبرو کر کے نکالا گیا ہے، اس لیے الیکشن پر حکم امتناع دیا جائے۔

سپریم کورٹ نے پشاور ہائیکورٹ کی جانب سے کیس کو غیر معینہ مدت کے لیے ملتوی کرنے کا فیصلہ بھی ختم کر دیا اور ہائیکورٹ کو ہدایت کی کہ وہ فریقین کو سن کر جلد فیصلہ کرے۔