آزاد کشمیر میں حکومت سازی کیلئے پیپلزپارٹی متحرک، صدر زرداری کا وزیراعظم سے رابطہ

آزاد کشمیر میں حکومت سازی کے معاملے پر سیاسی سرگرمیاں تیز ہو گئی ہیں۔ صدر آصف علی زرداری نے وزیراعظم شہباز شریف سے ٹیلی فونک رابطہ کرکے پیپلز پارٹی کے حکومت بنانے کے فیصلے پر انہیں اعتماد میں لیا۔

ایپل کا آئی فون ائیر فلاپ؟ کمپنی کا پیداوار 80 فیصد کم کرنے کا فیصلہ

ذرائع کے مطابق وزیراعظم شہباز شریف نے مسلم لیگ ن کی آزاد کشمیر امور کمیٹی کو پیپلز پارٹی سے مذاکرات کا ٹاسک دے دیا ہے۔ اس کمیٹی میں احسن اقبال، رانا ثنا اللہ اور امیر مقام شامل ہیں۔ ذرائع کا کہنا ہے کہ کمیٹی نے پیپلز پارٹی سے باضابطہ بات چیت سے قبل مسلم لیگ ن آزاد کشمیر کے رہنماؤں سے مشاورت کا آغاز کر دیا ہے۔

دوسری جانب مسلم لیگ ن کے پارلیمانی لیڈر اور سابق وزیراعظم آزاد کشمیر راجہ فاروق حیدر نے واضح کیا ہے کہ ان کی جماعت حکومت سازی کے کسی عمل کا حصہ نہیں بنے گی۔ ان کے مطابق ن لیگ کی پارلیمانی پارٹی پہلے ہی فیصلہ کر چکی ہے کہ وہ اپوزیشن میں بیٹھے گی اور اس فیصلے میں کوئی تبدیلی نہیں ہوگی۔

پیپلز پارٹی کے رہنما قمر زمان قائرہ کا کہنا ہے کہ مسلم لیگ ن نے اپوزیشن میں بیٹھنے کے فیصلے سے انہیں آگاہ نہیں کیا، تاہم اگر پیپلز پارٹی کے پاس مطلوبہ اعداد و شمار پورے ہوئے تو وہ آزاد کشمیر میں اپنی حکومت بنانے کی کوشش کرے گی۔