دبئی:
وفاقی وزیر برائے انفارمیشن ٹیکنالوجی شزا فاطمہ نے کہا ہے کہ پاکستان کی آئی ٹی برآمدات کو آئندہ سال تک 5 ارب ڈالر تک بڑھانے کا ہدف مقرر کیا گیا ہے۔
جیو نیوز کے مطابق دبئی میں پاکستان مشنز برائے یو اے ای کی جانب سے وزارتِ آئی ٹی اینڈ ٹیلی کمیونی کیشن، پاکستان سافٹ ویئر ایکسپورٹ بورڈ اور ٹریڈ ڈیولپمنٹ اتھارٹی آف پاکستان کے اشتراک سے “پاکستان ٹیک ایوننگ” کے عنوان سے تقریب منعقد کی گئی۔
نیتن یاہو نے ’غزہ امن معاہدہ دستخط تقریب‘ میں شرکت کیوں نہیں کی؟ وجہ سامنے آگئی
تقریب سے خطاب کے بعد میڈیا سے گفتگو کرتے ہوئے شزا فاطمہ نے بتایا کہ گزشتہ مالی سال کے دوران پاکستان کی آئی ٹی برآمدات 3.8 ارب ڈالر رہیں، جبکہ آئندہ سال تک انہیں 5 ارب ڈالر تک بڑھانے کا ہدف رکھا گیا ہے۔
انہوں نے کہا کہ خلیجی ممالک کے ساتھ پاکستان میں سرمایہ کاری کے حوالے سے بات چیت جاری ہے، خاص طور پر سب میرین کیبلز اور ڈیٹا سینٹرز کے قیام میں پیش رفت ہو رہی ہے۔
وفاقی وزیر نے مزید بتایا کہ حکومت رواں سال 10 لاکھ پاکستانی نوجوانوں کو انفارمیشن ٹیکنالوجی کی مفت تربیت فراہم کر رہی ہے تاکہ ڈیجیٹل مہارتوں میں اضافہ اور برآمدی استعداد کو فروغ دیا جا سکے۔
اس موقع پر متحدہ عرب امارات میں پاکستان کے سفیر فیصل نیاز ترمذی نے کہا کہ پاکستان جدت، سرمایہ کاری اور عالمی تعاون کے ذریعے اپنی آئی ٹی برآمدات کو موجودہ 4 ارب ڈالر سے بڑھا کر 100 ارب ڈالر تک لے جانے کی صلاحیت رکھتا ہے۔
