وزیراعظم شہباز شریف نے کہا ہے کہ حکومت اپنے کشمیری بھائیوں کے مسائل کے حل کے لیے عملی اقدامات جاری رکھے گی۔
آزاد کشمیر میں کامیاب مذاکرات کے بعد حکومتی مذاکراتی کمیٹی نے وزیراعظم سے ملاقات کی، جس میں راجہ پرویز اشرف، رانا ثناء اللہ، احسن اقبال، محمد اورنگزیب، سردار یوسف، طارق فضل اور احد چیمہ سمیت دیگر اراکین شریک تھے۔
وزیراعظم نے کمیٹی کے اراکین کی کشمیر میں معاملات کو خوش اسلوبی سے حل کرنے کی کوششوں کو سراہا اور کہا کہ جوائنٹ ایکشن کمیٹی نے بھی کشمیر کی ترقی اور خوشحالی کے لیے معاملہ فہمی کا مظاہرہ کیا، جس کے وہ مستحق ہیں۔
شہباز شریف نے کہا کہ حکومت کشمیری عوام کے تمام تحفظات کو دور کرے گی، عوامی مفاد اور امن حکومت کی اولین ترجیح ہیں، اور آزاد کشمیر کے عوام کی خدمت کا سلسلہ جاری رہے گا۔
انہوں نے مزید کہا کہ حکومت ماضی میں بھی کشمیری عوام کے حقوق کی محافظ رہی ہے اور آئندہ بھی ان کے حقوق کے تحفظ کے لیے پرعزم ہے۔ ان کا کہنا تھا کہ آزاد کشمیر کے مسائل ہمیشہ ترجیحی بنیادوں پر حل کیے گئے ہیں، اور حکومت کشمیری عوام کی امنگوں کے مطابق ان کی ترقی و خوشحالی کے لیے کام کرتی رہے گی۔
