کراچی میں جشنِ آزادی اور معرکۂ حق کی مناسبت سے نیشنل اسٹیڈیم میں میوزیکل نائٹ کا اہتمام کیا جا رہا ہے، جس کے لیے ٹریفک پولیس نے خصوصی ٹریفک پلان اور پارکنگ کے انتظامات جاری کر دیے ہیں۔
ٹریفک پولیس کے مطابق وہ گاڑیاں جنہیں خصوصی اسٹیکرز جاری کیے گئے ہیں، وہ نیشنل اسٹیڈیم کے گیٹ نمبر 1 اور 11 سے داخل ہو سکیں گی۔
تقریب میں شرکت کے لیے آنے والے شہری ایکسپو سینٹر یا چائنا گراؤنڈ میں اپنی گاڑیاں پارک کر سکیں گے، جہاں سے انہیں شٹل سروس کے ذریعے اسٹیڈیم پہنچایا جائے گا۔
ٹریفک پولیس نے شہریوں کو ہدایت کی ہے کہ نیشنل اسٹیڈیم اور سر شاہ سلیمان روڈ پر متوقع ٹریفک دباؤ سے بچنے کے لیے متبادل راستوں کا انتخاب کریں۔ بسیں، منی بسیں اور دیگر کمرشل گاڑیاں بھی متبادل راستوں کی جانب بھیجی جائیں گی، جبکہ ہر قسم کی ہیوی ٹریفک کا داخلہ بند رہے گا۔
عوام سے اپیل کی گئی ہے کہ وہ اپنی گاڑیاں اور موٹر سائیکلیں سروس روڈ پر کھڑی نہ کریں اور قانون نافذ کرنے والے اداروں سے مکمل تعاون کریں تاکہ ٹریفک کی روانی اور تقریب کا ماحول محفوظ و پُرامن بنایا جا سکے۔
