سرگودھا: انسدادِ دہشت گردی عدالت نے پاکستان تحریک انصاف (پی ٹی آئی) کے رہنما اور پنجاب اسمبلی میں اپوزیشن لیڈر ملک احمد خان بھچر سمیت 51 ملزمان کے وارنٹ گرفتاری جاری کر دیے۔
دنیا نیوز کے مطابق، یہ کارروائی 9 مئی کو میانوالی میں ہنگامہ آرائی، توڑ پھوڑ اور جلاؤ گھیراؤ کے مقدمات کی سماعت کے دوران کی گئی۔ عدالت نے کیس میں کسی بھی ملزم کی عدم پیشی پر وارنٹ گرفتاری جاری کیے، جن میں احمد خان بھچر، بلال اعجاز اور احمد چٹھہ شامل ہیں۔
عدالت نے متعدد بار طلبی کے باوجود پیش نہ ہونے پر عمر ایوب کو اشتہاری قرار دینے کی کارروائی بھی شروع کر دی ہے۔
عدالت نے کیس کی سماعت 29 جولائی تک ملتوی کرتے ہوئے نئے طلبی نوٹسز جاری کر دیے، جبکہ 9 مئی کے چار دیگر مقدمات میں شہادتیں قلمبند کی گئیں۔
واضح رہے کہ 9 مئی کو جوڈیشل کمپلیکس میانوالی میں ہونے والی ہنگامہ آرائی کے سلسلے میں 57 نامزد اور 150 نامعلوم افراد کے خلاف مقدمہ درج کیا گیا تھا۔
