پاکستان کے معروف ڈرامہ نگار، میزبان اور مزاح نگار انور مقصود نے کہا ہے کہ وہ کسی سیاسی جماعت کے رکن نہیں بلکہ صرف پاکستان کے ساتھ ہیں۔
لاہور میں ایک پریس کانفرنس کے دوران انور مقصود نے کہا کہ جب ملک کے حالات خراب ہوتے ہیں تو ان کا اپنا حال بھی برا ہو جاتا ہے۔ انہوں نے بتایا کہ وہ گزشتہ 68 برس سے ملک کے حالات اور عوام کے مسائل پر لکھ رہے ہیں۔
انور مقصود نے واضح کیا کہ ان کا نیا ڈرامہ ’ہاؤس اریسٹ‘ کوئی سیاسی ڈرامہ نہیں بلکہ ایک مزاحیہ پیشکش ہے۔ ڈرامے کی پروڈیوسر وجیہہ نے بتایا کہ اسے کراچی اور اسلام آباد میں بے حد پذیرائی ملی ہے۔
انہوں نے بتایا کہ یہ ڈرامہ اُن مہاجر خواتین کے درد پر مبنی ہے جنہیں اُن کے بیٹے گھروں میں قید کر دیتے ہیں۔ انور مقصود نے مزید انکشاف کیا کہ اس ڈرامے کے اسکرپٹ میں 109 ترامیم کی گئیں۔
انور مقصود کا کہنا تھا کہ الحمرا ہال میں ڈرامہ پیش کرنے کی اجازت نہیں ملی کیونکہ اس میں رقص کی بجائے پرانے گانے شامل کیے گئے تھے، جبکہ اسلام آباد میں جب دو شو ہوئے تو وہاں چھاپہ مارا گیا۔
ڈرامے کے ہدایتکار داور محمود نے بتایا کہ ’ہاؤس اریسٹ‘ کو 3 اگست تک فیروز پور روڈ کے ایک آڈیٹوریم میں پیش کیا جائے گا۔
