خیبرپختونخوا اسمبلی میں مخصوص نشستوں پر کامیاب پچیس ارکان نے حلف اٹھالیا ہے۔ یہ حلف برداری گورنر ہاؤس میں ہوئی جہاں گورنر فیصل کریم کنڈی نے ارکان سے حلف لیا۔ اس سے قبل اسمبلی اجلاس میں کورم کی نشاندہی پر اجلاس ملتوی کر دیا گیا تھا جس پر اپوزیشن جماعتیں پشاور ہائی کورٹ گئیں اور عدالت نے گورنر کو حلف لینے کا اختیار دیا۔ حلف اٹھانے والوں میں جمعیت علمائے اسلام کی سات خواتین اور دو اقلیتی ارکان، مسلم لیگ ن کی سات خواتین اور ایک اقلیتی رکن، پیپلز پارٹی کی چار خواتین اور ایک اقلیتی رکن، اے این پی کی دو اور پی ٹی آئی پارلیمنٹرینکی ایک خاتون شامل ہیں۔ اب خیبرپختونخوا اسمبلی میں ارکان کی کل تعداد ایک سو پینتالیس ہوگئی ہے۔
