راولپنڈی (نمائندہ خصوصی) فوجی فرٹیلائزر کمپنی (ایف ایف سی) کا 47واں سالانہ جنرل اجلاس ایف ایف سی کے کارپوریٹ ہیڈ آفس، سونا ٹاور، راولپنڈی میں کامیابی کے ساتھ منعقد ہوا۔ اجلاس میں 56 فیصد کورم مکمل کیا گیا اور مختلف شیئر ہولڈرز کے علاوہ اہم کارپوریٹ اداروں کے نمائندگان نے شرکت کی، جن میں فوجی فاؤنڈیشن، اسٹیٹ لائف انشورنس کارپوریشن، سٹی بینک، ڈوئچے بینک، نافا (NAFA)، این آئی ٹی (NIT)، اے پی ایف (APF)، اٹلس (ATLAS) اور دیگر ادارے شامل تھے۔ کچھ شرکاء نے پراکسیز اور ویڈیو کانفرنسنگ کے ذریعے بھی اجلاس میں شرکت کی۔
اجلاس کا آغاز کمپنی سیکریٹری ایف ایف سی، بریگیڈیئر (ریٹائرڈ) خرم شہزادہ، ستارہ امتیاز (ملٹری) نے کیا، جبکہ چیئرمین ایف ایف سی بورڈ آف ڈائریکٹرز، لیفٹیننٹ جنرل (ریٹائرڈ) انور علی حیدر، ہلال امتیاز (ملٹری) نے شرکاء کو خوش آمدید کہا۔
منیجنگ ڈائریکٹر اور چیف ایگزیکٹو آفیسر ایف ایف سی، جناب جہانگیر پراجہ نے اجلاس کے دوران سال 2024 کی کارکردگی پر تفصیلی بریفنگ دی، جس میں کمپنی کی ترقی، آپریشنل کامیابیوں اور شیئر ہولڈرز کے لیے فراہم کردہ قدر پر روشنی ڈالی گئی۔
انہوں نے شیئر ہولڈرز کے مختلف سوالات کے جوابات دیے اور کمپنی کے مستقبل کے اہداف اور حکمت عملی پر بھی تفصیل سے بات کی۔ جناب جہانگیر پراجہ نے اس عزم کا اعادہ کیا کہ ایف ایف سی پائیدار ترقی، جدت طرازی اور شیئر ہولڈرز کے لیے مستحکم منافع کی فراہمی کو یقینی بنائے گا۔یہ اجلاس ایف ایف سی کی انڈسٹری میں قائدانہ حیثیت، شفافیت اور طویل مدتی مالی استحکام کے عزم کی مظہر ہے اور کمپنی کے کامیاب مستقبل کی ضمانت فراہم کرتا ہے۔
