اسلام آباد(نیوزڈیسک)وفاقی وزیرِ داخلہ محسن نقوی نے فرنٹیئر کور ساؤتھ بلوچستان کے ہیڈ کوارٹر کا دورہ کیا جہاں پر آئی جی میجر جنرل بلال سرفراز خان نے ان کا استقبال کیا۔
وزیرِ داخلہ محسن نقوی نے فرنٹیئر کور ساؤتھ کے ہیڈکوارٹر میں یادگار شہداء پر حاضری دی، شہداء کے درجات کی بلندی کے لیے دعا کی اور ان کی قربانیوں کو خراج عقیدت پیش کیا۔
محسن نقوی کی زیرِ صدارت فرنٹیئر کور ساؤتھ کے ہیڈ کوارٹر میں ہونے والے اجلاس میں فتنہ الخوارج کے خلاف آپریشنز اور انسداد اسمگلنگ کارروائیوں پر بریفنگ دی گئی۔
مزیدپڑھیں:محسن نقوی سے اویس نورانی کی ملاقات
وزیرِ داخلہ نے بلوچستان میں قیام امن اور انسداد اسمگلنگ کے لیے فرنٹیئر کور ساؤتھ کی کارکردگی کو سراہتے ہوئے کہا کہ فتنہ الخوارج کے مذموم عزائم ناکام بنانے میں ایف سی ساؤتھ فرنٹ لائن پر ہے
محسن نقوی کا کہنا ہے کہ فرنٹیئر کور نے مشکل حالات میں امن کے لیے مثالی خدمات انجام دی ہیں، وہ بلوچستان میں امن کے لیے ہراول دستے کا کردار ادا کر رہی ہے۔
انہوں نے کہا کہ فرنٹیئر کور ساؤتھ کے افسران اور جوانوں کی پیشہ ورانہ مہارت اور بہادری پر ناز ہے، ان کی ضروریات کو وسائل میں رہتے ہوئے پورا کیا جائے گا، بلوچستان کی خوشحالی و ترقی پائیدار امن سے منسلک ہے۔
وفاقی وزیر کا کہنا ہے کہ بلوچستان کے نوجوانوں کو بااختیار بنانے کے لیے جامع اقدامات کی ضرورت ہے، بلوچستان کی پائیدار ترقی کے لیے تمام اسٹیک ہولڈرز کو ایک صفحے پر آنا ہو گا۔
