لاہور(نمائندہ خصوصی)وزیر اطلاعات پنجاب عظمی بخاری نے بیرسٹر سیف کے بیان پر ردعمل میں کہاکہ بیرسٹر صاحب میں نے آپ کے منہ سے کبھی خیبرپختونخوا کے قیدیوں اور مریضوں کے لیے کوئی بات نہیں سنی۔کس حیثیت میں بانی پی ٹی آئی اور بشری بی بی کو خیبرپختونخوا میں شفٹ کریں؟پھر باقی قیدیوں کو بھی انکے صوبوں میں شفٹ کردیں۔
انہوں نے کہاکہ بانی پی ٹی آئی اور بشری بی بی کے کیسز عدالتوں میں چل رہے جائیں وہاں سے آپکو ریلیف مل رہا ہے،آپکی خواہشات کے مطابق عدالتی فیصلے ہوں تو واہ واہ کرتے فیصلے مخالف ہوتو انتقام کہتے ہیں۔
ان کا کہنا تھا کہ اڈیالہ جیل کی انتظامیہ دو بار بشری بی بی کے میڈیکل ٹیسٹ کروا چکی ہے،جیل انتظامیہ دونوں کے ٹیسٹ کروارہی ہے،آپکی کرپٹ اور بدیانت پیرنی صاحبہ مکمل فٹ ہے۔
عظمی بخاری نے کہاکہ دونوں میاں بیوی جیل میں نہیں خالہ کے گھر میں ہیں آپ کو پریشان ہونے کی ضرورت نہیں، بانی پی ٹی آئی اور بشری بی بی مزے سے شاہانہ جیل کاٹ رہے ہیں۔
ان کا کہنا تھا کہ مریم نواز سے بغض اور تعصب آپ کی ذہنی حالت کی غمازی کرتا ہے، مریم نواز 2014 سے ہی آپ کے جعلی انقلابی لیڈر کے سر پر سوار ہیں،انتقامی سیاست ہم نے بھگتی ہے لیکن آپ لوگوں کی طرح رونا دھونا نہیں کیا۔
ان کا کہنا تھا کہ میاں نواز شریف،مریم نواز،شہباز شریف سمیت مسلم لیگ نون کے درجنوں رہنماں نے جیلیں کاٹی کسی ایک نے بھی جیل انتظامیہ سے سہولیات مانگی نہ ہی کوئی شکایت کی۔
