اسلام آباد(نیوزڈیسک)اسپیکر قومی اسمبلی سردارایازصادق سےبرطانوی ہائی کمشنر نے ملاقات کی ہے۔
قومی اسمبلی سیکرٹریٹ سے جاری بیان میں کہاگیاکہ جمعرات کو سپیکر قومی اسمبلی سردار ایاز صادق سے برطانوی ہائی کمشنر جین میریٹ نے ملاقات کی ۔
ملاقات میں دوطرفہ تعلقات سمیت باہمی دلچسپی کے اہم امور پر تبادلہ خیال کیاگیا۔
اس موقع پر سردارایازصادق نے کہاکہ پاکستان کے برطانیہ کے ساتھ دیرینہ دوستانہ تعلقات ہیں۔پاکستانی حکومت اور عوام برطانیہ کے ساتھ خوشگوار تعلقات کو مزید مستحکم بنانے کی طرف گامزن ہے۔
اسپیکرقومی اسمبلی نے کہاکہ ملکی معیشت کی بحالی کے لیے سیاسی اتفاق رائے ناگزیر ہے۔
انہوں نے کہاکہ پاکستانی قوم ایک پرعزم قوم ہے اور ماضی میں ملک کو چیلنجز سے کامیابی کے ساتھ نکلا ہے۔پاکستان برطانیہ کے ساتھ پارلیمانی اور اقتصادی تعاون سے تعلقات کو مزید مستحکم بنانے کا خواہاں ہے۔
انہوں نے کہاکہ دونوں ممالک کی پارلیمانوں کے درمیان بات چیت سے معیشت کے مختلف شعبوں میں تعاون کو مزید مستحکم کیا جا سکتا ہے۔برطانیہ میں مقیم پاکستانی برطانیہ کی قومی ترقی میں اپنا مثبت کردار ادا کر رہے ہیں۔
انہوں نے کہاکہ پاک برطانیہ پارلیمانی فرینڈ شپ گروپ دوطرفہ تعلقات کو مضبوط بنانے میں اپنا کردار ادا کر رہا ہے۔
جبکہ ہائی کمشنر جین میریٹ نے کہاکہ برطانیہ پاکستان کے ساتھ اپنے تاریخی اور دیرینہ تعلقات کو اہمیت دیتا ہے۔اسلام آباد میں یوکے ہائی کمیشن دوطرفہ اقتصادی تعاون بڑھانے میں ہرممکن تعاون فراہم کرے گا۔
انہوں نے کہاکہ پارلیمانی دوستی گروپس کے پلیٹ فارم سے دونوں ممالک کے مابین مضبوط پارلیمانی تعلقات کو مزید وسعت دینے کی ضرورت ہے۔
