اسلام آباد میں وزارت خزانہ آئندہ ماہ تک آئی ایم ایف کو بجٹ عملدرآمد کے نظام میں اصلاحات سے متعلق حتمی تجاویز پیش کرے گی۔
ذرائع کے مطابق بجٹ عملدرآمد کے طریقہ کار میں بہتری کے لیے آئی ایم ایف کے ٹیکنیکل وفد کے ساتھ مختلف اصلاحاتی تجاویز پر مشاورت جاری ہے۔
سابق انٹرنیشنل امپائر خضر حیات انتقال کرگئے
پاکستان اور آئی ایم ایف کے درمیان بجٹ کے عملدرآمد میں بہتری کے لیے مجموعی طور پر پندرہ تجاویز زیر غور ہیں، جن میں پبلک فنانس مینجمنٹ نظام کو مکمل طور پر ڈیجیٹل بنانے کا منصوبہ بھی شامل ہے۔
اس مقصد کے لیے ڈیجیٹل پلان کی نگرانی کے لیے ایک خصوصی کمیٹی تشکیل دینے کی تجویز بھی زیر غور ہے۔
اصلاحاتی تجاویز میں بجٹ تیاری کے پورے عمل کو ای-آفس اور ای-پیڈز کے ذریعے مکمل طور پر ڈیجیٹل بنانا، مالی ڈیٹا میں تضادات ختم کرنا اور نئے ڈیٹا کی بنیاد پر بجٹ سازی شامل ہے۔
بجٹ تیاری میں تمام وزارتوں کے ساتھ مشاورت کے عمل کو مزید مؤثر بنانے پر بھی زور دیا گیا ہے۔
ذرائع کے مطابق ٹیکنیکل مشن نے آئندہ بجٹ کے لیے ٹیکس پالیسی میں اہم تبدیلیوں سے متعلق تجاویز پر بھی پاکستان کے معاشی حکام کے ساتھ تفصیلی گفتگو کی ہے۔
وزارت خزانہ کا کہنا ہے کہ اصلاحات کا مقصد بجٹ عملدرآمد کے نظام کو شفاف، موثر اور ڈیجیٹل بنانا ہے تاکہ مالی نظم و ضبط بہتر ہو اور پالیسی فیصلوں میں ڈیٹا پر مبنی نقطہ نظر کو فروغ دیا جا سکے۔
