ویمنز ورلڈکپ: سری لنکا اور بنگلادیش کے میچ میں غیر معمولی اسٹمپ آؤٹ، کھلاڑی بھی حیران

آئی سی سی ویمنز کرکٹ ورلڈکپ میں ایک غیر معمولی اسٹمپنگ کے واقعے نے شائقین، کھلاڑیوں اور کمنٹیٹرز کو حیران کر دیا۔ پیر کے روز بھارت کے ڈی وائی پاٹل اسٹیڈیم میں سری لنکا اور بنگلادیش ویمنز ٹیموں کے درمیان میچ کے دوران پیش آنے والا یہ واقعہ کرکٹ کی تاریخ کی انوکھی جھلک بن گیا۔
وزیراعلیٰ کے پی سہیل آفریدی اب تک کابینہ تشکیل نہ دے سکے، اہم فیصلوں میں تاخیر

میچ کے 20ویں اوور میں بنگلادیشی بولر ناہیدہ نے آف اسٹمپ کے باہر گیند کرائی جس پر سری لنکن بیٹر دلہاری نے بیک فٹ پر شاٹ کھیلنے کی کوشش کی۔ گیند بیٹ کے اندرونی حصے سے ٹکرا کر آف اسٹمپ کے قریب اچھلی اور وکٹ کیپر نگار سلطانہ کی دائیں ٹانگ سے لگ کر واپس اسٹمپ پر جا لگی۔

پہلے تو بنگلادیشی کھلاڑیوں نے کوئی خاص ردعمل نہیں دیا، لیکن بعد میں ہلکی سی اپیل پر فیلڈ امپائر نے معاملہ تھرڈ امپائر کو بھیج دیا۔ ری پلے دیکھ کر سب حیران رہ گئے کیونکہ دلہاری کا پچھلا پاؤں اس وقت معمولی سا ہوا میں تھا جب گیند وکٹ کیپر کی ٹانگ سے ٹکرا کر اسٹمپ کو لگی اور بیلز گر گئیں۔

تھرڈ امپائر نے ری پلے کی بنیاد پر سری لنکن بیٹر کو آؤٹ قرار دیا۔ بڑی اسکرین پر فیصلہ آتے ہی اسٹیڈیم میں حیرت اور جوش کی کیفیت پیدا ہوگئی، بنگلادیشی ٹیم خوشی سے جھوم اٹھی جبکہ کمنٹیٹرز بھی اس غیر معمولی منظر پر داد دیے بغیر نہ رہ سکے۔

یہ اسٹمپنگ اس لحاظ سے منفرد تھی کہ عام طور پر وکٹ کیپر گلووز سے گیند پکڑ کر وکٹ پر مار کر بیٹر کو آؤٹ کرتا ہے، مگر اس بار گیند حادثاتی طور پر وکٹ کیپر کی ٹانگ سے لگ کر اسٹمپ پر جا لگی — اور بیٹر کو آؤٹ قرار دیا گیا۔