نئی دہلی: بھارت کی سپریم کورٹ میں ایک ناخوشگوار واقعہ پیش آیا جب دورانِ سماعت ایک وکیل نے چیف جسٹس بی آر گوائی پر جوتا پھینک دیا۔
بھارتی میڈیا کے مطابق پیر کی صبح چیف جسٹس بی آر گوائی نے جیسے ہی دن کا پہلا مقدمہ سننا شروع کیا، 71 سالہ وکیل نے اچانک نعرے بازی شروع کر دی اور چیف جسٹس کی جانب جوتا پھینک دیا۔
سیکیورٹی اہلکاروں نے فوری کارروائی کرتے ہوئے ملزم کو گرفتار کر لیا۔ پولیس کے مطابق جوتا پھینکنے والے وکیل کی شناخت راکیش کشور کے نام سے ہوئی ہے، جس نے تقریباً 11 بج کر 35 منٹ پر کورٹ نمبر 1 میں یہ حرکت کی۔
ایک سینیئر پولیس افسر کے مطابق واقعے کے فوراً بعد ملزم کو پکڑ کر سپریم کورٹ کی سیکیورٹی یونٹ کے حوالے کر دیا گیا۔
بھارتی میڈیا کے مطابق راکیش کشور دہلی کے علاقے مایور وہار کا رہائشی اور سپریم کورٹ بار ایسوسی ایشن کا رجسٹرڈ رکن ہے۔
ابتدائی تحقیقات میں معلوم ہوا ہے کہ وکیل چیف جسٹس کے ان حالیہ ریمارکس سے ناراض تھا جو مدھیا پردیش کے کھاجوراہو مندر سے متعلق ایک کیس کے دوران دیے گئے تھے۔
چیف جسٹس گوائی نے واقعے پر کوئی ردعمل نہیں دیا اور عدالتی کارروائی معمول کے مطابق جاری رکھنے کی ہدایت کی۔
