ویمنز کرکٹ ورلڈکپ کے ہائی وولٹیج مقابلے میں بھارتی ویمنز ٹیم نے پاکستان کو باآسانی 88 رنز سے شکست دے دی۔
کولمبو کے پریماداسا اسٹیڈیم میں کھیلے گئے میچ میں پاکستان ویمنز ٹیم 248 رنز کے ہدف کے تعاقب میں 159 رنز بنا کر آل آؤٹ ہو گئی۔ اوپنر سدرہ امین کی 81 رنز کی شاندار اننگز بھی ٹیم کو شکست سے نہ بچا سکی۔
نتالیہ پرویز 33 رنز کے ساتھ دوسری نمایاں بیٹر رہیں، تاہم باقی کھلاڑی خاطر خواہ کارکردگی دکھانے میں ناکام رہیں۔ وکٹوں کے تسلسل سے نقصان کے باعث قومی ٹیم 43ویں اوور میں 159 رنز پر ڈھیر ہو گئی۔
بھارت کی جانب سے دیپتی شرما اور کرانتی نے 3،3 وکٹیں حاصل کیں، جبکہ سنہ رانا نے 2 کھلاڑیوں کو آؤٹ کیا۔
اس سے قبل بھارتی ٹیم نے پہلے بیٹنگ کرتے ہوئے مقررہ 50 اوورز میں 247 رنز بنائے۔
پراتیکا راول اور سمرتی مندھانا نے بالترتیب 31 اور 23 رنز بنائے، ہرلین دیول نے 46 رنز کی اننگز کھیلی، جبکہ کپتان ہرمن پریت کور نے 19، جمیما روڈریگز نے 32، دیپتی شرما نے 25، سنہ رانا نے 20 اور وکٹ کیپر رچا گھوش نے 35 رنز کی جارحانہ اننگز کھیلی۔
پاکستان کی جانب سے ڈیانا بیگ نے بہترین بولنگ کا مظاہرہ کرتے ہوئے 4 کھلاڑیوں کو آؤٹ کیا، سعدیہ اقبال اور فاطمہ ثنا نے 2،2 جبکہ رامین شمیم اور نشرا سندھو نے ایک ایک وکٹ حاصل کی۔
واضح رہے کہ پاکستان ویمنز ٹیم ایونٹ کے اپنے پہلے میچ میں بنگلہ دیش سے 5 وکٹوں سے شکست کھا چکی ہے۔
