اوپن اے آئی کی نئی سوشل میڈیا ایپ ‘سورا 2’ متعارف کرا دی گئی

سان فرانسسکو: مصنوعی ذہانت (Artificial Intelligence) کی معروف کمپنی اوپن اے آئی (OpenAI) — جو چیٹ جی پی ٹی کی خالق ہے — نے اپنی نئی اور منفرد سوشل میڈیا ایپلی کیشن ’سورا 2‘ (Sora 2) متعارف کرا دی ہے۔

اوپن اے آئی کی جانب سے جاری بلاگ پوسٹ کے مطابق، ’سورا 2‘ ایپل پلے اسٹور پر دستیاب ہے، جبکہ جلد ہی اسے گوگل پلے اسٹور پر بھی پیش کیا جائے گا۔

یہ ایپلی کیشن نہ صرف ایک اے آئی ویڈیو جنریشن پلیٹ فارم ہے بلکہ اسے ٹک ٹاک اور انسٹاگرام کی طرز پر ویڈیو شیئرنگ ایپ کے طور پر بھی استعمال کیا جا سکے گا۔

صارفین اس ایپ میں تحریری ہدایات (Text Prompts) کے ذریعے اے آئی ویڈیو کلپس تخلیق کر سکیں گے اور انہیں براہِ راست اسی پلیٹ فارم پر شیئر بھی کیا جا سکے گا۔

فی الحال، ’سورا 2‘ کا ویب یا ڈیسک ٹاپ ورژن متعارف نہیں کرایا گیا ہے، لہٰذا یہ ایپ صرف موبائل صارفین کے لیے دستیاب ہے۔

تاہم، کمپنی کے مطابق، مستقبل میں ڈیسک ٹاپ ورژن بھی پیش کیا جائے گا تاکہ صارفین اس ایپ کو انسٹاگرام اور ٹک ٹاک کی طرح ویب انٹرفیس پر بھی استعمال کر سکیں۔