اینٹی کرپشن عدالت لاہور نے سابق وزیراعلیٰ پنجاب چودھری پرویز الٰہی کی ایک روزہ حاضری سے معافی کی درخواست منظور کرلی ہے۔
کیس کی سماعت اینٹی کرپشن عدالت کے جج جاوید اقبال وڑائچ نے کی، مقدمہ پنجاب اسمبلی میں مبینہ غیر قانونی بھرتیوں سے متعلق ہے، جس میں چودھری پرویز الٰہی سمیت دیگر افراد نامزد ہیں۔
سماعت کے دوران چودھری پرویز الٰہی کے وکیل نے عدالت کو بتایا کہ ان کے موکل کی طبیعت ناساز ہے، لہٰذا انہیں آج کے دن کے لیے حاضری سے استثنا دیا جائے، عدالت نے یہ درخواست منظور کرتے ہوئے حاضری سے ایک روزہ معافی دے دی۔
ادھر مقدمے میں شریک ملزمان اعجاز، زوہیب اورحیدرشفقات نے اپنی بریّت کی درخواستیں عدالت میں جمع کروا دیں، عدالت نے ان درخواستوں پراینٹی کرپشن حکام کو نوٹسزجاری کرتے ہوئے آئندہ سماعت پردلائل طلب کرلیے ہیں۔
اسی طرح شریک ملزم مختاررانجھا کی بریّت کی درخواست پر بھی وکلا سے آئندہ سماعت پر دلائل طلب کیے گئے ہیں۔
عدالت نے تمام فریقین کوآئندہ سماعت کے لیے طلب کرتے ہوئے کیس کی مزید کارروائی 8 اکتوبر 2025 تک ملتوی کر دی ہے۔
