نیشنل ڈیزاسٹر مینجمنٹ اتھارٹی (این ڈی ایم اے) نے 25 جولائی تک مون سون بارشوں کے باعث ممکنہ سیلابی صورتحال اور لینڈ سلائیڈنگ کے خطرے کے پیش نظر الرٹ جاری کر دیا ہے۔
ترجمان این ڈی ایم اے کے مطابق خیبرپختونخوا کے مختلف علاقوں میں 25 جولائی تک وقفے وقفے سے بارشیں متوقع ہیں۔ اس دوران دریائے کابل، سوات، پنجکوڑہ، کالپانی نالے اور بارہ نالے میں طغیانی کا خطرہ موجود ہے، جبکہ نوشہرہ، مالاکنڈ، سوات، دیر اور بالائی پہاڑی علاقوں میں سیلابی صورتحال اور لینڈ سلائیڈنگ کا خدشہ ہے۔
مزید بتایا گیا کہ اسلام آباد، راولپنڈی، لاہور، سیالکوٹ، فیصل آباد اور ملتان میں شدید بارشوں کی پیشگوئی کی گئی ہے، جبکہ خانیوال، ساہیوال، مظفرگڑھ، کوٹ ادو، تونسہ، راجن پور، بہاولپور اور رحیم یار خان میں بھی موسلا دھار بارشیں متوقع ہیں۔
ان بارشوں کے باعث لاہور، راولپنڈی، ملتان اور دیگر شہری علاقوں میں اربن فلڈنگ کا خطرہ ہے، اور نشیبی علاقے زیر آب آ سکتے ہیں۔
ترجمان این ڈی ایم اے نے مزید بتایا کہ سندھ کے اضلاع کراچی، حیدرآباد، سکھر، جیکب آباد، ٹھٹھہ، بدین، لاڑکانہ، جامشورو، نوابشاہ اور میرپورخاص میں بھی بارش کا امکان ہے۔ ان بارشوں کے نتیجے میں سندھ کے شہری علاقوں میں سڑکوں، گلیوں اور انڈرپاسز میں پانی جمع ہونے اور شہری سیلاب جیسی صورتحال پیدا ہونے کا خدشہ ہے۔
