کوالالمپور: پاکستان فٹبال فیڈریشن (پی ایف ایف) کے تین رکنی وفد نے 35ویں ایشین فٹبال کنفیڈریشن (اے ایف سی) کانگریس میں شرکت کی۔ وفد کی قیادت پی ایف ایف کے صدر اور نیشنل کمیٹی کے چیئرمین سعود عظیم ہاشمی نے کی۔
کوالالمپور میں ہونے والی اس کانگریس میں پی ایف ایف کے عبوری جنرل سیکریٹری اور نیشنل کمیٹی کے رکن محمد شاہد نیاز کھوکھر اور نیشنل کمیٹی کے رکن بیرسٹر حارث عظمت بھی شامل تھے۔
کانگریس کے دوران فیفا کے صدر جیانی انفینٹینو نے ایک ورچوئل خطاب کیا جس میں فیفا ورلڈ کپ 2026 کے حوالے سے اہم معلومات شیئر کیں۔ جیانی انفینٹینو نے کہا کہ فیفا ورلڈ کپ 2026 میں 48 ٹیموں کی شرکت ہوگی اور اس میں 9 ایشیائی ٹیموں کو کوٹہ مختص کیا جائے گا۔
اس کے علاوہ، جیانی انفینٹینو نے سعودی عرب کو 2034 فیفا ورلڈ کپ کی میزبانی کے لیے منتخب ہونے پر مبارکباد دی۔
ایشین فٹبال کنفیڈریشن کے صدر شیخ سلمان بن ابراہیم الخلیفہ نے ایشیائی کلب فٹبال کی تیزی سے ترقی کو سراہا اور اس بات پر زور دیا کہ ایشیا میں فٹبال کی مقبولیت مسلسل بڑھ رہی ہے۔
کانگریس میں اے ایف سی کے بجٹ 2025-2026 کی باقاعدہ منظوری بھی دی گئی۔
پی ایف ایف کے صدر سعود عظیم ہاشمی نے سعودی عرب، بھارت، نیپال اور دیگر ممالک کے آفیشلز سے بھی ملاقاتیں کیں، جس دوران فٹبال کے حوالے سے مختلف امور پر بات چیت کی گئی۔
