(نیوز ڈیسک)ظہران ممدانی کا ٹرمپ پر بھرپور ردعمل: مجھے نشانہ بنایا جا رہا ہے تاکہ اصل مسائل سے توجہ ہٹائی جا سکے”
امریکا کے سابق صدر ڈونلڈ ٹرمپ کی جانب سے ملک بدری کی دھمکیوں پر نیویارک کے میئر کے امیدوار ظہران ممدانی نے سخت ردعمل دیا ہے۔ ان کا کہنا ہے کہ ٹرمپ ان پر ذاتی حملے صرف اس لیے کر رہے ہیں تاکہ عوام کی توجہ اپنی ناکام پالیسیوں سے ہٹا سکیں۔
ظہران ممدانی، جو 33 سالہ مسلمان اور جنوبی ایشیائی نژاد سیاستدان ہیں، نے بدھ کو جاری کردہ ایک ویڈیو پیغام میں کہا کہ وہ پیچھے ہٹنے والے نہیں ہیں۔ انہوں نے دوٹوک انداز میں واضح کیا کہ وہ اپنی جدوجہد جاری رکھیں گے اور ریپبلکن جماعت کی جانب سے اختلاف رائے کو دبانے کی ہر کوشش کا بھرپور مقابلہ کریں گے۔
نیویارک میں ایک ریلی سے خطاب کرتے ہوئے ممدانی نے کہا، "گزشتہ روز ٹرمپ نے میرے متعلق کہا کہ مجھے گرفتار کر لینا چاہیے، مجھے ملک سے نکال دینا چاہیے اور میری شہریت ختم کر دینی چاہیے۔ یہ سب صرف اس لیے کہا گیا کیونکہ میں ایک ایسا شخص ہوں جو اس شہر میں میئر بننے جا رہا ہے — ایک ایسا مسلمان جو کئی نسلوں بعد اس مقام تک پہنچا ہے۔”
انہوں نے مزید کہا، "یہ حملے میری شناخت، میرے پس منظر، میرے رنگ یا میری زبان کی وجہ سے کیے جا رہے ہیں، لیکن اصل بات یہ ہے کہ ٹرمپ اس حقیقت سے توجہ ہٹانا چاہتے ہیں کہ میں محنت کش عوام کے حقوق کے لیے آواز بلند کر رہا ہوں۔”
ظہران ممدانی نے ٹرمپ پر الزام عائد کیا کہ وہ امریکی معاشرے کو تقسیم کر رہے ہیں اور یہ تسلیم کرنے سے گریزاں ہیں کہ ان کی قیادت نے نیویارک سمیت پورے امریکہ کے محنت کش طبقے کو شدید مایوس کیا ہے۔
یاد رہے کہ ٹرمپ نے ممدانی کو "کمیونسٹ پاگل” قرار دیتے ہوئے کہا تھا کہ وہ امریکی صدر کی حیثیت سے نیویارک شہر کو تباہی سے بچائیں گے۔ انہوں نے دعویٰ کیا کہ ان کے پاس مکمل اختیارات اور طاقت ہے اور وہ نیویارک کو دوبارہ عظیم بنائیں گے۔
