دنیا بھر میں گردے کے امراض میں خطرناک حد تک اضافہ دیکھنے میں آیا ہے اور یہ اب اموات کی بڑی وجوہات میں شامل ہیں۔
طبی ماہرین کے مطابق گردے جسم کے لیے نہایت اہم اعضاء ہیں جو خون کو صاف کرتے، فضلہ خارج کرتے اور جسم میں نمکیات کا توازن برقرار رکھتے ہیں۔ تاہم بلڈ شوگر، ہائی بلڈ پریشر، موٹاپا اور غیر صحت مند طرزِ زندگی گردوں کی کارکردگی متاثر کر سکتے ہیں، جس سے گردے کی ناکامی کا خطرہ بڑھ جاتا ہے۔
نائب وزیراعظم اسحاق ڈار کو ترک وزیر خارجہ کا فون، مسجد دھماکے پر افسوس کا اظہار
عالمی تحقیق کے مطابق تقریباً 788 ملین افراد طویل عرصے تک گردے کی بیماری کا شکار ہیں، جو 1990 کے مقابلے میں تقریباً دوگنا اضافہ ہے۔ عالمی ادارہ صحت کے مطابق ہر سال تقریباً 1.5 ملین افراد گردے کی ناکامی کے سبب زندگی کی بازی ہار جاتے ہیں۔
گردے کو صحت مند رکھنے کے اہم اقدامات:
* بلڈ شوگر کو قابو میں رکھیں کیونکہ زیادہ شوگر گردوں کی فلٹریشن صلاحیت کو کمزور کر سکتی ہے۔
* بلڈ پریشر مستحکم رکھیں تاکہ گردوں کی شریانیں محفوظ رہیں اور کارکردگی متاثر نہ ہو۔
* ادویات کا بے جا استعمال نہ کریں، خاص طور پر درد کش اور این ایس اے آئی ڈی (NSAIDs) دوائیں، جو طویل استعمال پر گردوں کو نقصان پہنچا سکتی ہیں۔
* پروٹین کا متوازن استعمال کریں کیونکہ ضرورت سے زیادہ پروٹین گردوں پر اضافی دباؤ ڈال سکتی ہے۔
* روزانہ مناسب پانی پئیں تاکہ گردے فضلہ خارج کر سکیں اور جسم ہائیڈریٹ رہے۔
* نقصان دہ کیمیکلز سے بچیں جو کھانے، پانی یا جلد پر لگنے سے گردوں کے لیے خطرناک ہو سکتے ہیں۔
* خاندانی صحت سے آگاہ رہیں اور اگر خاندان میں کسی کو گردے کے امراض ہیں تو باقاعدگی سے چیک اپ کروائیں۔
* وزن قابو میں رکھیں کیونکہ زیادہ وزن گردوں پر دباؤ بڑھاتا ہے اور ذیابیطس و ہائی بلڈ پریشر کے خطرات میں اضافہ کرتا ہے۔
* باقاعدہ گردوں کی جانچ کروائیں تاکہ بیماری کے ابتدائی اشارے وقت پر سامنے آ سکیں۔
* صحت مند طرزِ زندگی اپنائیں، جس میں متوازن غذا، مناسب نیند اور روزانہ ورزش شامل ہو تاکہ گردوں کی کارکردگی بہتر رہے۔
گردے اکثر “خاموش قاتل” کہلاتے ہیں کیونکہ ابتدائی مراحل میں واضح علامات ظاہر نہیں ہوتیں۔ مگر یہ احتیاطی تدابیر اپنا کر آپ اپنی گردوں کی صحت برقرار رکھ سکتے ہیں اور خطرناک بیماریوں سے محفوظ رہ سکتے ہیں۔
