مقبوضہ مغربی کنارے کو ضم کرنے کا اسرائیلی فیصلہ مسترد، پاکستان کا عالمی برادری سے اقدامات کا مطالبہ

اسلام آباد میں پاکستان نے اسرائیل کی جانب سے مقبوضہ مغربی کنارے کو ضم کرنے کے فیصلے کو مسترد کرتے ہوئے عالمی برادری سے فوری اور مؤثر اقدامات کا مطالبہ کیا ہے۔

وزارتِ خارجہ نے اپنے بیان میں کہا کہ پاکستان مقبوضہ مغربی کنارے کے انضمام کی اسرائیلی کوششوں اور وہاں صہیونی ریاست کی خودمختاری کے نفاذ کے اقدامات کی سخت مذمت کرتا ہے۔ ترجمان دفترِ خارجہ کے مطابق اسرائیلی قانون ساز ادارے میں پیش کیا گیا متنازع قانون اقوام متحدہ کی سلامتی کونسل کی قراردادوں، بین الاقوامی قوانین اور فلسطینی عوام کے ناقابلِ تنسیخ حقوق کی واضح خلاف ورزی ہے۔

تیونس کے قریب تارکین وطن کی کشتی ڈوب گئی، 40 افراد ہلاک

ترجمان نے کہا کہ ایسے غیر قانونی اور اشتعال انگیز اقدامات خطے میں امن و استحکام کے لیے جاری کوششوں کو نقصان پہنچاتے ہیں۔ پاکستان نے عالمی برادری پر زور دیا کہ وہ ان سرگرمیوں کو روکنے کے لیے فوری کردار ادا کرے اور قابض اسرائیلی افواج کو بین الاقوامی قوانین کی خلاف ورزیوں پر جوابدہ ٹھہرائے۔

پاکستان نے اس عزم کا اعادہ کیا کہ وہ علاقائی اور بین الاقوامی شراکت داروں کے ساتھ مل کر فلسطینی عوام کے حقِ خود ارادیت، امن اور انصاف کے لیے اپنی کوششیں جاری رکھے گا۔

پاکستان نے فلسطینی عوام کی غیر متزلزل حمایت دہراتے ہوئے کہا کہ وہ 1967 سے قبل کی سرحدوں پر مبنی ایک آزاد، خودمختار اور قابلِ عمل ریاستِ فلسطین کے قیام کا خواہاں ہے جس کا دارالحکومت القدس الشریف ہو۔