اڈیالہ جیل کے قیدی کی بانی پی ٹی آئی جیسی سہولیات دینے کی درخواست پر فیصلہ محفوظ

اسلام آباد:
اسلام آباد ہائیکورٹ نے اڈیالہ جیل میں قید قتل کے مجرم محمد عرفان کی جانب سے بانی پی ٹی آئی کو دی جانے والی سہولیات فراہم کرنے کی درخواست پر ابتدائی دلائل سننے کے بعد فیصلہ محفوظ کر لیا۔

جسٹس محمد اعظم خان کی سربراہی میں سماعت ہوئی، جس دوران عدالت نے ریمارکس دیے کہ اس معاملے پر جلد حکم جاری کیا جائے گا۔
کھانسی کے یہ 3 سیرپ مت خریدیں،الرٹ جاری
درخواست گزار محمد عرفان کے وکیل نوید ملک ایڈووکیٹ نے مؤقف اختیار کیا کہ ان کا موکل قتل کے مقدمے میں 25 سال قید کی سزا بھگت رہا ہے۔ انہوں نے بتایا کہ سپرنٹنڈنٹ جیل کو بارہا سپیریئر کلاس سہولیات دینے کی درخواست کی گئی لیکن کوئی سہولت فراہم نہیں کی گئی۔

وکیل نے کہا کہ بانی پی ٹی آئی کو جیل میں بہتر سہولیات اور ملاقاتوں کی اجازت حاصل ہے، جبکہ ان کے موکل کو ان سہولیات سے محروم رکھا گیا ہے۔

درخواست میں موقف اپنایا گیا ہے کہ جس طرح کی سہولیات بانی پی ٹی آئی کو دی گئی ہیں، وہی سہولیات درخواست گزار کو بھی فراہم کی جائیں۔

درخواست میں سیکریٹری داخلہ، سپرنٹنڈنٹ اڈیالہ جیل، چیف کمشنر اسلام آباد اور ہوم ڈیپارٹمنٹ کو فریق بنایا گیا ہے۔ عدالت نے ابتدائی دلائل مکمل ہونے کے بعد درخواست کے قابلِ سماعت ہونے پر فیصلہ محفوظ کر لیا۔