پشاور ہائیکورٹ کا گورنر خیبرپختونخوا کو کل نو منتخب وزیر اعلیٰ سے حلف لینے کا حکم

پشاور ہائیکورٹ نے گورنر خیبرپختونخوا فیصل کریم کنڈی کو ہدایت کی ہے کہ وہ کل نو منتخب وزیر اعلیٰ سہیل آفریدی سے حلف لیں۔

عدالت نے نومنتخب وزیر اعلیٰ سے حلف نہ لیے جانے کے خلاف دائر درخواست پر محفوظ فیصلہ سناتے ہوئے کہا کہ گورنر بدھ کے روز شام 4 بجے سہیل آفریدی سے حلف لیں۔ اگر گورنر حلف نہ لیں تو اسی روز صوبائی اسمبلی کے اسپیکر نومنتخب وزیر اعلیٰ سے حلف لیں گے۔

چیف جسٹس پشاور ہائیکورٹ کی سربراہی میں اس درخواست کی سماعت ہوئی۔ سماعت کے دوران ایڈیشنل اٹارنی جنرل نے بتایا کہ گورنر سرکاری دورے پر گئے ہیں اور کل دو بجے واپس آئیں گے۔
بھارتی قید سے رہا ہونیوالے 48 ماہی گیر کراچی پہنچ گئے
چیف جسٹس نے استفسار کیا کہ گورنر نے حلف برداری کے حوالے سے کیا موقف اختیار کیا ہے؟ اس پر ایڈیشنل اٹارنی جنرل نے بتایا کہ گورنر نے استعفے کی منظوری کے لیے علی امین گنڈاپور کو بلایا ہے۔

عدالت نے پوچھا کہ کیا گورنر نے حلف برداری کے لیے رضامندی ظاہر کی ہے یا نہیں؟ اٹارنی جنرل نے جواب دیا کہ گورنر کے واپس آنے کے بعد فیصلہ کیا جائے گا، انہوں نے عامر جاوید کو دلائل کے لیے نامزد کیا ہے۔

عامر جاوید ایڈووکیٹ نے عدالت میں کہا کہ گورنر کے واپس آنے کا انتظار کیا جائے، وہ کل تک آجائیں گے تو حلف برداری ہو جائے گی۔ انہوں نے مزید کہا کہ نئے وزیر اعلیٰ کے آنے تک موجودہ وزیر اعلیٰ ہی دفتر کے امور چلائیں گے۔

اس پر عدالت نے ریمارکس دیے کہ ایسا صرف اس صورت میں ہوتا ہے جب الیکشن نہ ہوا ہو، جبکہ یہاں الیکشن ہو چکا ہے اور دیگر جماعتوں نے بھی وزارت اعلیٰ کے لیے کاغذات نامزدگی جمع کرائے ہیں۔