معرکہ حق میں فتح: فیلڈ مارشل، ائیر چیف اور بلاول سمیت وفاقی وزراء اعلیٰ کو اعزازات سے نواز دیا گیا
اسلام آباد: معرکۂ حق میں بھارت کو ذلت آمیز شکست دینے پر فیلڈ مارشل سید عاصم منیر اور ایئر چیف مارشل ظہیر احمد بابر سدھو کو ہلالِ جرأت سے نوازا گیا۔
ایوانِ صدر میں ہونے والی پُروقار تقریب میں صدرِ مملکت آصف علی زرداری نے معرکۂ حق میں نمایاں عسکری و سفارتی خدمات انجام دینے والی شخصیات کو اعلیٰ سول و فوجی اعزازات سے نوازا۔
فیلڈ مارشل سید عاصم منیر کو معرکۂ حق کے دوران غیرمعمولی جرأت، شجاعت اور جنگی مہارت کے اعتراف میں ہلالِ جرأت سے نوازا گیا، جبکہ ایئر چیف مارشل ظہیر احمد بابر سدھو کو بھی غیر متزلزل حب الوطنی، جنگی قیادت اور دشمن کے خلاف فیصلہ کن کارروائیوں پر ہلالِ جرأت عطا کیا گیا۔
چیئرمین جوائنٹ چیفس آف اسٹاف کمیٹی جنرل ساحر شمشاد مرزا اور نیول چیف ایڈمرل نوید اشرف کو نشانِ امتیاز دیا گیا، جبکہ ڈی جی آئی ایس آئی لیفٹیننٹ جنرل عاصم ملک کو ستارۂ بسالت عطا کیا گیا۔ ڈی جی ملٹری آپریشنز میجر جنرل کاشف عبداللہ، ایئر وائس مارشل محمد اورنگزیب، اور رئیر ایڈمرل شہزاد حامد کو تمغۂ بسالت سے نوازا گیا۔
معرکۂ حق میں دشمن کے جنگی طیارے مار گرانے والے پاک فضائیہ کے جانباز پائلٹس کو ستارۂ جرأت سے نوازا گیا۔ ونگ کمانڈر بلال رضا، جنہوں نے دشمن کا ایئر ڈیفنس کمانڈ اینڈ کنٹرول سسٹم تباہ کیا، کو دلیرانہ فضائی مہارت پر ستارۂ جرأت دیا گیا۔ ونگ کمانڈر حماد بن مسعود کو بھی اسی اعزاز سے نوازا گیا۔ اسکواڈرن لیڈر محمد یوسف خان، محمد اسامہ اشفاق، محمد حسن انیس، اور طلال حسن کو بھی ستارۂ جرأت سے نوازا گیا۔
اس کے علاوہ سفارتی محاذ پر نمایاں کارکردگی پر وزیر خارجہ اسحاق ڈار، پارلیمانی کمیٹی کے سربراہ بلاول بھٹو زرداری، وزیر قانون اعظم نذیر تارڑ، وزیر دفاع خواجہ آصف، اور وزیراعظم کے مشیر رانا ثناء اللہ کو نشانِ امتیاز دیا گیا۔
وزیر اطلاعات عطا تارڑ کو بھی نشانِ امتیاز سے نوازا گیا، جبکہ وزیر داخلہ سید محسن رضا نقوی، وفاقی وزراء احسن اقبال، شیری رحمان، فیصل سبزواری، مصدق ملک، اور حنا ربانی کھر کو بھی نمایاں خدمات پر اعلیٰ سول اعزازات عطا کیے گئے۔
