فیلڈ مارشل اور آرمی چیف جنرل عاصم منیر نے کہا ہے کہ دہشتگردی کے خاتمے کے لیے قومی سطح پر یکجہتی ناگزیر ہے۔
آئی ایس پی آر کے مطابق، نیشنل ورکشاپ بلوچستان کے شرکا نے فیلڈ مارشل جنرل عاصم منیر سے ملاقات کی، جس دوران انہوں نے قومی اتحاد، بلوچستان کی ترقی، اور داخلی استحکام پر زور دیا۔
جنرل عاصم منیر نے کہا کہ پاک فوج دہشتگردی کے مکمل خاتمے کے لیے پُرعزم ہے۔ انہوں نے بھارت کی جانب سے دہشتگرد تنظیموں کی پشت پناہی کی شدید مذمت کرتے ہوئے کہا کہ فتنہ الخوارج اور فتنہ الہندستان بھارت کی ناکام پراکسیز ہیں۔ معرکۂ حق میں شکست کے بعد بھارت نے پراکسی جنگ میں شدت پیدا کی ہے، لیکن دہشتگرد نہ کسی مذہب کے نمائندہ ہیں، نہ کسی قوم یا فرقے کے۔
انہوں نے بلوچستان میں جاری ترقیاتی منصوبوں کو ملکی ترقی کا ضامن قرار دیا اور کہا کہ قومی ترقی کے لیے ادارہ جاتی ہم آہنگی اور مربوط حکمت عملی ضروری ہے۔
سپہ سالار نے واضح کیا کہ پاکستان علاقائی امن کے لیے پُرعزم ہے، مگر کسی بھی خطرے کا منہ توڑ جواب دینے کی مکمل صلاحیت رکھتا ہے۔
ملاقات کے اختتام پر فیلڈ مارشل جنرل عاصم منیر نے شرکا کے سوالات کے تفصیلی جوابات بھی دیے۔
