لاہور سے موصول ہونے والی اطلاعات کے مطابق پنجاب حکومت نے جنگلی حیات کے تحفظ اور ایکو ٹورزم (ماحول دوست سیاحت) کے فروغ کے لیے 9.4 ارب روپے کی لاگت سے دو بڑے منصوبوں کی منظوری دے دی ہے۔ ان منصوبوں کا دائرہ کار جہلم، اٹک، چکوال، میانوالی، چھانگا مانگا، لال سہانرہ بہاولپور، صحرائے چولستان اور ڈی جی خان میں کوہِ سلیمان کے پہاڑی سلسلوں تک پھیلا ہوا ہے۔
وزیر داخلہ کا وفاقی پولیس اہلکاروں کیلئے پلاٹس اور بیرون ملک اسکالرشپس کا اعلان
پہلا منصوبہ ‘پنجاب وائلڈ لائف کنزرویشن اینڈ ہیبی ٹیٹ ریسٹوریشن پروگرام’ ہے جس پر 3.9 ارب روپے خرچ کیے جائیں گے۔ اس کا مقصد جنگلی حیات کی کم ہوتی ہوئی آبادی کو مستحکم کرنا، ان کے قدرتی مساکن کو بحال کرنا اور مقامی آبادی کو اس تحفظ کے عمل میں شریک کرنا ہے۔ سالٹ رینج، کالا چٹا رینج اور کوہِ سلیمان میں کمیونٹی بیسڈ کنزرویسیز قائم کی جائیں گی جہاں اڑیال، چنکارہ اور سلیمان مارخور کی افزائشِ نسل کے لیے اقدامات کیے جائیں گے۔ اس کے علاوہ تیتر کی افزائش کے مراکز اور پاڑہ، سانبھر، چیتل، نیل گائے اور کالے ہرن کی دوبارہ آبادکاری بھی اسی منصوبے کا حصہ ہے۔
دوسرا منصوبہ 5.5 ارب روپے کی لاگت سے سالٹ رینج اور لال سہانرا نیشنل پارکس میں ایکو ٹورزم کے فروغ کے لیے شروع کیا گیا ہے۔ اس کے تحت سیاحوں کے لیے ایکو لاجز، فیملی پکنک ایریاز، ہائیکنگ ٹریکس اور ویو پوائنٹس تعمیر کیے جائیں گے۔ سیاحوں کی ان مقامات تک آسان رسائی کے لیے موٹروے ایم ٹو پر سالٹ رینج کے مقام پر ایک نیا انٹرچینج بھی تعمیر کیا جائے گا۔
ڈائریکٹر جنرل پنجاب وائلڈ لائف مبین الہی کے مطابق یہ منصوبے پہلی بار صوبے میں تحفظِ حیات، سیاحت اور مقامی کمیونٹی کو ایک مشترکہ حکمتِ عملی کے تحت جوڑ رہے ہیں جس سے نہ صرف ماحول کو فائدہ ہوگا بلکہ مقامی لوگوں کے لیے روزگار کے مواقع بھی پیدا ہوں گے۔ حکام کا کہنا ہے کہ ایکو ٹورزم کا منصوبہ جون 2027 تک مکمل ہوگا جبکہ قدرتی مساکن کی بحالی کا منصوبہ مزید دو سال تک جاری رہے گا۔ مقامی آبادی نے اسے علاقے کی پائیدار ترقی کے لیے ایک مثبت قدم قرار دیا ہے۔
