اسلام آباد میں وزیر خارجہ اسحاق ڈار نے کہا کہ دنیا میں جاری تنازعات عالمی امن کے لئے خطرہ ہیں اور مئی میں ہونے والی پاک بھارت جنگ انتہائی خطرناک ثابت ہوسکتی تھی۔
پی آئی اے کی نجکاری کیلئے وسط دسمبر کی تاریخ مقرر
ایک تقریب سے خطاب میں اسحاق ڈار نے کہا کہ موسمیاتی تبدیلی اس وقت بڑا چیلنج ہے اور جنوبی ایشیا کو غربت، ناخواندگی اور ناگہانی آفات سمیت کئی مسائل کا سامنا ہے۔ انہوں نے کہا کہ جنوبی ایشیائی ممالک کو اپنے مسائل کے حل کے لیے سنجیدگی سے سوچنا ہوگا۔
نائب وزیراعظم نے کہا کہ دنیا میں جاری تنازعات عالمی امن کے لیے خطرہ ہیں، اسرائیل نے غزہ میں انسانیت کا قتل عام کیا ہے، جبکہ مسئلہ کشمیر کے حل نہ ہونے سے خطے کا امن خطرے میں ہے۔ انہوں نے کہا کہ جنوبی ایشیا دنیا کا سب سے زیادہ آبادی والا خطہ ہے۔
انہوں نے کہا کہ عالمی معاشی منظرنامہ تیزی سے بدل رہا ہے، جنوبی ایشیا میں موسمیاتی تبدیلی اور غذائی قلت کے چیلنجز سنگین ہوتے جا رہے ہیں، درجہ حرارت میں اضافہ اور سیلاب معیشت پر تباہ کن اثرات مرتب کر رہے ہیں۔
اسحاق ڈار نے کہا کہ جنوبی ایشیا میں سکیورٹی کی صورتحال پیچیدہ ہے، بھارت نے یکطرفہ طور پر سندھ طاس معاہدہ معطل کرنے کا اعلان کیا، مئی میں پاک بھارت جنگ خطرناک ثابت ہوسکتی تھی، پاکستان مذاکرات اور سفارتکاری کے ذریعے تنازعات کے حل کی حمایت کرتا ہے۔
