لاہور: پنجاب حکومت نے صوبے بھر میں امن و امان کی صورتحال کے پیش نظر دفعہ 144 کے نفاذ میں 7 روز کی توسیع کر دی ہے۔
مسیحیوں کے قتل عام پر خاموش نہیں رہیں گے، ٹرمپ کی نائیجیریا کو فوجی کارروائی کی دھمکی
محکمہ داخلہ پنجاب کی جانب سے جاری نوٹیفکیشن کے مطابق اب یہ پابندی 8 نومبر تک برقرار رہے گی۔ اس دوران صوبے بھر میں احتجاج، جلسے، جلوس، ریلیوں، دھرنوں اور عوامی اجتماعات پر مکمل پابندی عائد رہے گی، جبکہ 4 یا زائد افراد کے عوامی مقامات پر جمع ہونے کی اجازت نہیں ہوگی۔
اعلامیے میں کہا گیا ہے کہ دفعہ 144 کے تحت اسلحے کی نمائش، لاؤڈ اسپیکر کے استعمال، اور اشتعال انگیز یا نفرت آمیز مواد کی اشاعت و تقسیم پر بھی مکمل پابندی برقرار رہے گی۔
محکمہ داخلہ کے مطابق یہ فیصلہ صوبے میں امن و امان کے قیام، انسانی جانوں اور املاک کے تحفظ کے لیے کیا گیا ہے۔
ترجمان نے وضاحت کی کہ پابندی کا اطلاق شادی کی تقریبات، جنازوں، اور تدفین پر نہیں ہوگا۔ سرکاری فرائض انجام دینے والے افسران و اہلکار اور عدالتیں بھی اس فیصلے سے مستثنیٰ ہوں گی، جبکہ لاؤڈ اسپیکر صرف اذان اور جمعے کے خطبے کے لیے استعمال کیے جا سکیں گے۔
