فیصل آباد سی سی ڈی نے گجرانوالہ میں 6 سال قبل نوجوان کے قتل میں ملوث ملزم کو گرفتار کر لیا۔ گرفتار ملزم نے عدالت میں پیش ہو کر تحریک انصاف کے رکن قومی اسمبلی نثار جٹ پر قتل کروانے کا الزام عائد کیا۔
زوہیب نامی شوٹر نے عدالت میں دفعہ 164 کے تحت بیان ریکارڈ کرواتے ہوئے بتایا کہ رکن قومی اسمبلی ڈاکٹر نثار نے اسے پہلے مقتول بلال چیمہ کی مخبری کے لیے 25 ہزار روپے دیے۔ اس کے بعد وہ اپنے ساتھیوں کے ساتھ گجرانوالہ گیا اور وہاں بلال چیمہ کو قتل کر دیا۔
ملزم کے مطابق قتل کے بعد لاش کو گاڑی میں ڈال کر کمالیہ لے جایا گیا، جہاں ڈاکٹر نثار احمد کے کہنے پر اسے نہر میں پھینک دیا گیا۔ اس کام کے بعد ملزم کو مزید 50 ہزار روپے ادا کیے گئے۔
سی سی ڈی حکام کے مطابق ملزم نے اپنے ساتھیوں کے ہمراہ 2019 میں ہونے والے قتل کا اعتراف کر لیا ہے، جبکہ اس کے بیان کی روشنی میں مزید تفتیش جاری ہے۔
