واشنگٹن:امریکی وزیرِ خارجہ مارکو روبیو نے کہا ہے کہ غزہ میں جنگ کا اختتام ابھی نہیں ہوا اور خطے میں پائیدار امن کے لیے مزید اقدامات درکار ہیں۔
ایک بیان میں مارکو روبیو نے کہا کہ اسرائیل اور حماس کے درمیان معاہدے پر بات چیت جاری ہے اور امید ہے کہ تفصیلات جلد طے پا جائیں گی۔ ان کے مطابق، حماس نے جنگ کے بعد کے اقدامات پر اصولی اتفاق کر لیا ہے۔
انہوں نے کہا کہ اسلحے کی واپسی اور حماس کی تحلیل کا مرحلہ سب سے مشکل ہوگا، کیونکہ غزہ میں ایک مستحکم حکومت فوری طور پر قائم نہیں کی جا سکتی۔ روبیو کے مطابق، جلد واضح ہو جائے گا کہ حماس امن عمل میں واقعی سنجیدہ ہے یا نہیں۔
امریکی وزیرِ خارجہ نے بتایا کہ یرغمالیوں کی رہائی کے معاملے میں فریقین اب پہلے سے کہیں زیادہ قریب آ گئے ہیں، تاہم یہ عمل ہفتوں یا دنوں تک طول نہیں پکڑ سکتا۔
مارکو روبیو نے مزید کہا کہ 90 فیصد معاملات طے پا چکے ہیں اور امید ہے کہ معاہدہ اسی ہفتے کے آغاز میں مکمل ہو جائے گا، تاہم ان کا کہنا تھا کہ غزہ معاہدے پر 100 فیصد یقین دہانی ممکن نہیں۔
انہوں نے واضح کیا کہ جب تک فضائی حملے جاری رہیں گے، یرغمالیوں کی رہائی ممکن نہیں، لہٰذا بمباری کا سلسلہ فوری طور پر روکنا ہوگا۔
