چیف جسٹس آف پاکستان، جسٹس یحییٰ آفریدی نے یومِ آزادی پاکستان کے موقع پر اپنے خصوصی پیغام میں کہا ہے کہ آئینِ پاکستان نہ صرف بنیادی حقوق کی ضمانت دیتا ہے بلکہ شہری آزادیوں کا محافظ بھی ہے۔
اپنے پیغام میں چیف جسٹس نے کہا کہ ہم آج اپنے پیارے وطن کا 78واں یومِ آزادی منا رہے ہیں، اس پر میں پوری قانونی برادری اور پاکستانی عوام کو دل کی گہرائیوں سے مبارکباد پیش کرتا ہوں۔ یہ دن ہمارے آبا و اجداد کے غیر متزلزل عزم، قربانیوں اور دوراندیش وژن کی ایک یادگار علامت ہے۔
انہوں نے کہا کہ ہمارا آئین قوم کی امنگوں کا ترجمان ہے، جو شہریوں کے بنیادی حقوق کی حفاظت کرتا ہے اور اس بات کو یقینی بناتا ہے کہ انصاف ہمارے معاشرتی ڈھانچے کی بنیاد بنا رہے۔
چیف جسٹس یحییٰ آفریدی نے اس عزم کا اظہار کیا کہ ہمیں معاشرے کے کمزور طبقوں کے حقوق کے تحفظ کے لیے پرعزم رہنا ہوگا اور اس بات کو یقینی بنانا ہوگا کہ کوئی بھی شخص قانون سے بالاتر نہ ہو۔
انہوں نے زور دیا کہ ایک ایسا معاشرہ پروان چڑھانا چاہیے جہاں اختلافات اور تنازعات کو منصفانہ طریقے سے حل کیا جائے اور ہر شہری اپنی زندگی میں انصاف کی موجودگی کو محسوس کرے۔
