انسدادِ دہشت گردی عدالت اسلام آباد نے بانی پی ٹی آئی عمران خان کی نااہلی کے خلاف فیض آباد پر ہونے والے احتجاج کے مقدمے میں فیصل جاوید خان کی بریت کی درخواست مسترد کر دی ہے اور اب اس معاملے کی اگلی سماعت اکتیس جولائی کو ہوگی۔
اس مقدمے کی سماعت انسدادِ دہشت گردی عدالت کے جج طاہر عباس سپرا نے کی، جہاں استغاثہ کی جانب سے دو گواہ پیش ہوئے، جبکہ عامر محمود کیانی، راشد حفیظ اور جمشید مغل سمیت دیگر ملزمان عدالت میں حاضر ہوئے، تاہم علی امین گنڈا پور اور فیصل جاوید پیش نہیں ہوئے۔ فیصل جاوید خان، حیدر بن مسعود اور راجہ ماجد کی جانب سے عدالت میں حاضری سے استثنیٰ کی درخواستیں دی گئیں، جس پر ان کے وکلاء الیاس صدیقی، سردار مصروف اور زاہد بشیر ڈار نے عدالت میں دلائل دیے۔ دورانِ سماعت جج نے ریمارکس دیے کہ آج گواہان کے بیانات ریکارڈ کر لیے جائیں اور ان پر جرح اگلی پیشی پر بھی کی جا سکتی ہے۔ علی امین گنڈا پور کی غیر حاضری پر ان کے وکیل نے عدالت سے کہا کہ ان کے متعلق گزشتہ حکم ہی دوبارہ جاری کیا جائے، جس پر جج نے درخواست دینے کا کہا۔ جج طاہر عباس سپرا نے پاکستان تحریک انصاف کے رہنما عامر کیانی کو مخاطب کرتے ہوئے کہا کہ وہ عدالت سے چلے جائیں کیونکہ وہ تین بار اشتہاری ہو چکے ہیں اور اگر پولیس نے سن لیا تو انہیں گرفتار کر لیا جائے گا۔ یہ بات یاد رہے کہ پاکستان تحریک انصاف کے کارکنان اور رہنماؤں کے خلاف عمران خان کی نااہلی کے خلاف احتجاج پر تھانہ آئی نو میں مقدمات درج ہیں۔
