اسلام آباد چیمبر آف کامرس اینڈ انڈسٹری (ICCI) نے انکم ٹیکس آرڈیننس کے متنازعہ سیکشن 37AA کو فوری طور پر ختم کرنے کا مطالبہ کرتے ہوئے کہا ہے کہ ٹیکس حکام کو عدالتی منظوری کے بغیر گرفتاری کا اختیار دینا سرمایہ کاروں کے اعتماد کو شدید نقصان پہنچا سکتا ہے۔
بدھ کو جاری کردہ بیان میں آئی سی سی آئی کے صدر ناصر منصور قریشی، سینئر نائب صدر عبدالرحمن صدیقی اور نائب صدر ناصر محمود چوہدری نے کہا کہ ایسے سخت اقدامات نہ صرف کاروباری ماحول میں عدم اعتماد کو فروغ دیتے ہیں بلکہ پاکستان کی کمزور معیشت کو مزید دباؤ میں ڈال سکتے ہیں۔
چیمبر نے واضح کیا کہ اس قسم کی شقیں شہریوں کے آئینی حقوق کے لیے بھی خطرناک ہیں اور معیشت میں پہلے سے موجود غیر یقینی صورتحال کو مزید بڑھا سکتی ہیں۔ رہنماؤں نے کہا کہ حکومت کی حالیہ ٹیکس ترامیم محض نمائشی نوعیت کی ہیں جو تاجروں کے اصل مسائل کو حل کرنے میں ناکام رہی ہیں۔
انہوں نے زور دیا کہ تاجر برادری ٹیکس کی ادائیگی کے خلاف نہیں ہے، لیکن ٹیکس نظام منصفانہ، شفاف اور قابل عمل ہونا چاہیے۔ موجودہ ٹیکس دہندگان پر مزید دباؤ ڈالنے کے بجائے ٹیکس نیٹ کو وسیع کرنے کی ضرورت پر زور دیا گیا۔
آئی سی سی آئی نے حکومت پر زور دیا کہ وہ ٹیکس اصلاحات کو عوام دوست اور کاروبار دوست بنائے تاکہ اعتماد کی فضا بحال ہو سکے اور ملک کی اقتصادی اور برآمدی پالیسیوں کو استحکام ملے۔
