کینڈی میں میڈیا سے گفتگو کرتے ہوئے **شاہین شاہ آفریدی** نے کہا ہے کہ انگلینڈ کے خلاف شکست کے باوجود ٹیم ابھی ٹورنامنٹ سے باہر نہیں ہوئی۔ انہوں نے امید ظاہر کی کہ اگر ٹیم اپنی اگلی فتح حاصل کر لیتی ہے اور دیگر نتائج موافق رہے تو پاکستان سیمی فائنل کی دوڑ میں شامل رہ سکتا ہے، خاص طور پر اگر **نیوزی لینڈ** اپنی آنے والی دونوں میچز ہار جائے۔
بتایا گیا کہ محسن نقوی گارنٹی دے رہے ہیں عمران خان کو الشفاء منتقل کریں گے: علیمہ خان
آئی سی سی ٹی ٹوئنٹی ورلڈکپ کے سپر ایٹ مرحلے میں **انگلینڈ** نے شاندار کارکردگی دکھاتے ہوئے پاکستان کو دو وکٹوں سے شکست دی اور سیمی فائنل کیلئے کوالیفائی کرلیا۔ انگلینڈ کی کامیابی میں **ہیری بروک** کی سنچری نے اہم کردار ادا کیا۔ پاکستان نے پہلے بیٹنگ کرتے ہوئے مقررہ بیس اوورز میں نو وکٹوں کے نقصان پر 164 رنز بنائے جبکہ انگلینڈ نے آخری اوور میں ہدف حاصل کرلیا۔
شاہین شاہ آفریدی نے پریس کانفرنس میں کہا کہ ہیری بروک نے غیر معمولی اور ورلڈ کلاس اننگز کھیلی جس کا کریڈٹ انہیں جاتا ہے۔ انہوں نے بتایا کہ ایک وقت میں پاکستان 180 رنز تک پہنچنے کی توقع کر رہا تھا مگر پارٹنرشپ قائم نہ ہو سکی۔ ان کا کہنا تھا کہ اس وکٹ پر کم از کم 180 رنز بنانے چاہیے تھے۔
فاسٹ بولر نے مزید کہا کہ شکست کی صورت میں پوری ٹیم کی کارکردگی کا جائزہ لیا جاتا ہے اور بہتری کی ہمیشہ گنجائش موجود رہتی ہے۔ انہوں نے اپنی کارکردگی پر توجہ مرکوز رکھنے کی بات کرتے ہوئے کہا کہ وہ جب بھی میدان میں اتریں گے وکٹ لینے کی بھرپور کوشش کریں گے اور انہیں کسی کو ثابت کرنے کی ضرورت نہیں بلکہ خود کو بہتر کرنا ان کا مقصد ہے۔
شاہین شاہ آفریدی نے کہا کہ کوچنگ اسٹاف کا اپنا منصوبہ ہوتا ہے اور ٹیم کو اسی کے مطابق چلایا جاتا ہے۔ انہوں نے امید ظاہر کی کہ پاکستان مستقبل کے میچز میں بہتر کارکردگی دکھائے گا اور ٹورنامنٹ میں اپنی امیدیں برقرار رکھے گا۔
