ایشیا کپ 2025 کو 5 سے 10 ستمبر کے درمیان متحدہ عرب امارات میں شروع کرنے کی تجویز سامنے آئی ہے۔
ڈھاکا میں ہونے والے ایشین کرکٹ کونسل (ACC) کے سالانہ اجلاس کے دوران یہ تجویز دی گئی کہ ایونٹ کا آغاز 5 سے 10 ستمبر کے درمیان ہو اور تمام میچز دبئی اور ابو ظبی میں کھیلے جائیں۔
ایشیا کپ میں پاکستان، بھارت سمیت 8 ٹیمیں ایکشن میں نظر آئیں گی۔ اجلاس کے بعد میڈیا سے گفتگو کرتے ہوئے اے سی سی کے صدر محسن نقوی نے بتایا کہ اجلاس میں کونسل کے تمام 25 ارکان نے شرکت کی اور خوشگوار ماحول میں مشاورت ہوئی۔ ان کا کہنا تھا کہ تمام ممبران اس بات پر متفق ہیں کہ اے سی سی کے پلیٹ فارم پر سیاست نہیں آنی چاہیے۔
محسن نقوی نے کہا کہ ہمیں صرف کرکٹ کے فروغ کے لیے کام کرنا چاہیے۔ انہوں نے مزید بتایا کہ ایشیا کپ کا باضابطہ شیڈول بھارت کی جانب سے بھیجا جانا باقی ہے، جس کے بعد ہی ایونٹ کا اعلان کیا جائے گا۔
اس کے علاوہ محسن نقوی نے ایشیا کپ سے قبل متحدہ عرب امارات میں پاکستان، افغانستان اور یو اے ای کے درمیان تین ملکی ٹی ٹوئنٹی سیریز کی بھی تصدیق کر دی۔
