پاکستان نے مقامی فون کی پیداوار میں اہم سنگ میل عبور کرلیا

پاکستان میں مقامی سطح پر موبائل فون کی پیداوار نومبر 2025 میں 8 فیصد اضافے کے ساتھ 2.49 ملین یونٹس تک پہنچ گئی ہے، جو پچھلے سال کے مقابلے میں ایک قابل ذکر اضافہ ہے۔ پاکستان ٹیلی کمیونیکیشن اتھارٹی کی رپورٹ کے مطابق نومبر میں مقامی طور پر تیار یا اسمبل کیے جانے والے موبائل فونز کی تعداد 2.31 ملین یونٹس سے بڑھ کر 2.49 ملین تک پہنچ گئی ہے۔

سابق ڈی جی آئی ایس آئی فیض حمید نے سزا کیخلاف اپیل دائر کردی

اگرچہ نومبر میں پیداوار میں اضافہ ہوا ہے، لیکن سال 2025 کے پہلے 11 ماہ یعنی جنوری سے نومبر کے دوران مجموعی پیداوار 27.6 ملین یونٹس رہی، جو پچھلے سال کے اسی عرصے کے مقابلے میں 3 فیصد کم ہے۔ اعداد و شمار کے مطابق اس مجموعی پیداوار میں اسمارٹ فونز کی تعداد 14.51 ملین تھی جو کل پیداوار کا 53 فیصد بنتی ہے، جبکہ باقی 13.09 ملین یونٹس یعنی 47 فیصد 2G فونز تھے۔ رپورٹ میں یہ بھی بتایا گیا ہے کہ نومبر تک مقامی پیداوار نے پاکستان کی موبائل فون کی مجموعی طلب کا 88 فیصد حصہ پورا کیا ہے، جو پچھلے ماہ کے 93 فیصد کے مقابلے میں کم ہے۔ اس کمی کی وجہ زیادہ درآمدات، بالخصوص ایپل آئی فون 17، بتائی گئی ہے۔ مقامی مارکیٹ میں اسمبل ہونے والے موبائل فونز میں انفینکس، وی جی او ٹیِل، ویوو، ایٹل، ٹیکنو، سیمسنگ، ژیومی، کیو موبائل، ریئل می اور جی فائیو جیسی برانڈز سرِ فہرست ہیں۔ ماہرین کے مطابق نومبر میں پیداوار میں یہ اضافہ صنعت کی معمول پر واپسی اور سست روی کے بعد بہتری کی علامت ہے، اور آئندہ 12 ماہ کے دوران موبائل فون کی فروخت میں 7 سے 8 فیصد تک اضافہ متوقع ہے، جس کی بڑی وجوہات روپے کی مستحکم قیمت، افراطِ زر میں کمی اور صارفین کی خریداری کی بڑھتی ہوئی صلاحیت ہیں۔