حکومت کا آن لائن کاروبار کے فروغ کیلیے اہم اقدام، پہلی ڈیجیٹل اکانومی کونسل کا قیام

حکومت پاکستان نے ملک میں ڈیجیٹل کاروباروں کو فروغ دینے اور آن لائن کاروباری ماحول کو مضبوط بنانے کے لیے پہلی ڈیجیٹل اکانومی کونسل کے قیام کا اعلان کر دیا ہے۔

یہ کونسل پاکستان ڈیجیٹل اتھارٹی (PDA) کے تحت قائم کی جائے گی، جو وزارت اطلاعات و ٹیکنالوجی کے زیر انتظام کام کرتی ہے۔ پی ڈی اے نے کونسل کے ڈھانچے کی تیاری کے لیے 40 اہم ڈیجیٹل کمپنیوں سے مشاورت کی ہے تاکہ پالیسی سازی زیادہ جامع اور مؤثر ہو۔

وزیراعلیٰ کے پی نے شہدا کے ورثا کی امدادی رقم 50 لاکھ سے بڑھاکر ایک کروڑ کردی

حکام کے مطابق کونسل آن لائن کاروباری ضوابط، ٹیکس پالیسیز اور دیگر متعلقہ فریم ورک پر مشورے فراہم کرے گی، جبکہ نجی شعبے کو پالیسی سازی میں شامل کرنے سے ایک مضبوط اور متوازن ڈیجیٹل معیشت قائم کرنے میں مدد ملے گی۔ کونسل نجی شعبے کے درمیان تعاون کو فروغ دے گی، علم کے اشتراک کے مواقع فراہم کرے گی اور ڈیجیٹل سرمایہ کاری بڑھانے میں اہم کردار ادا کرے گی۔ اس کے ذریعے حکومت کو مارکیٹ کے نئے رجحانات کو سمجھنے اور کاروباری چیلنجز کے حل تلاش کرنے میں بھی مدد ملے گی۔

وزیر اعظم پاکستان کے زیرِ صدارت کونسل کا باقاعدہ افتتاح متوقع ہے، جس سے نجی شعبے کی مہارت کو پالیسی سازی میں شامل کرنے اور حکومت اور صنعت کے درمیان مؤثر رابطے کے فروغ کا عزم ظاہر ہوتا ہے۔