موبائل فون کا استعمال صرف بڑوں تک محدود نہیں رہا، بلکہ بچے بھی اب اس کے بغیر رہنا پسند نہیں کرتے۔ حالیہ ایک رپورٹ میں پاکستان میں موبائل فون کے استعمال کے رجحانات پر روشنی ڈالی گئی ہے، جس میں یہ اہم سوال اٹھایا گیا کہ کیا پاکستان میں مرد خواتین کی نسبت زیادہ موبائل استعمال کرتے ہیں؟
ایشین ڈویلپمنٹ بینک کی جانب سے جاری کردہ رپورٹ "پاکستان کے ڈیجیٹل ایکو سسٹم” کے حوالے سے یہ حقیقت سامنے آئی ہے کہ پاکستان میں خواتین، مردوں کی نسبت ڈیجیٹل ٹیکنالوجی خصوصاً موبائل فون اور انٹرنیٹ تک رسائی میں بہت پیچھے ہیں۔
رپورٹ میں بتایا گیا ہے کہ پاکستان میں مردوں کی اکثریت کے پاس موبائل فون موجود ہیں، جبکہ خواتین کی بڑی تعداد یا تو موبائل فون رکھتی ہی نہیں یا صرف محدود فیچرز والے سادہ فون استعمال کرتی ہیں۔
خواتین کی انٹرنیٹ تک رسائی بھی بہت کم ہے، جس کے باعث وہ تعلیم، روزگار، مالیاتی سہولیات اور دیگر معلومات سے محروم رہتی ہیں۔
رپورٹ میں یہ بھی بتایا گیا ہے کہ گھروں میں مرد حضرات اکثر خواتین کو موبائل یا انٹرنیٹ استعمال کرنے سے روکتے ہیں، جس کی وجہ سے خواتین کو ڈیجیٹل سیکیورٹی، ہراسانی اور پرائیویسی کے مسائل کا زیادہ سامنا کرنا پڑتا ہے۔
ایک اور اہم پہلو یہ ہے کہ بہت سی خواتین کو موبائل یا اسمارٹ فون استعمال کرنے کی تربیت ہی نہیں دی جاتی، جبکہ اسکول اور تربیتی ادارے بھی لڑکیوں کو ڈیجیٹل تعلیم فراہم کرنے میں پیچھے ہیں۔
