اسلام آباد (نیوزڈیسک )پاکستان ٹوبیکو کمپنی کو ملک کی سب سے زیادہ ٹیکس ادا کرنے والی کمپنیوں میں سے ایک بڑی کمپنی ہونے کے حوالے سے اس کی گراں قدر خدمات پر حکومت پاکستان کی جانب سے ٹیکس ایکسیلنس ایوارڈ دیا گیا ہے۔ پاکستان ٹوبیکو کمپنی کے ترجمان کے مطابق حکومت پاکستان کی جانب سے یہ اعزاز پی ٹی سی کی پاکستان میں جاری سماجی ذمہ داریوں اور ملکی معیشت کو رواں رکھنے کے ضمن میں بے پناہ کاوشوں کا ادراک ہے۔
تفصیلات کے مطابق صرف2023میں پاکستان ٹوبیکو کمپنی نے مختلف ٹیکسوں اور ڈیوٹیوں کی مد میں قومی خزانے میں 229ارب روپے کی خطیر رقم جمع کروائی ہے۔جبکہ 2023میں پاکستان ٹوبیکو کمپنی کی جانب سے 48ملین ڈالر سے زائد کی برآمدات بھی کی گئی ہیں۔
ترجمان کے مطابق پاکستا ن میں کام کرنے والی بڑی ملٹی نیشنل کمپنی کے طور پر پاکستان ٹوبیکو کمپنی نے ہمیشہ مقامی ریگولیٹری قوانین پر عمل درآمداور ٹیکس کی ذمہ داریوں کو مکمل طور پر پورا کیا ہے اورملک کی ترقی میں ہمیشہ بڑھ چڑھ کر حصہ لیا ہے، جس کی ایک قابل قدر مثال پاکستان ٹوبیکو کمپنی کی جانب سے ماحولیاتی، سماجی اوراپنے کاروباری شعبے میں بے پناہ سرمایہ کاری ہے۔
حکومت پاکستان کی پاکستان ٹوبیکو کمپنی کی سب سے بڑی ٹیکس ادا کرنے والی کمپنیوں میں سے ایک کے طور پر پذیرائی کمپنی کی بہترین کارپوریٹ اقدار کے حصول کی انتھک لگن کی عکاسی کرتی ہے۔
