پاکستان خاموش توانائی انقلاب سے گزر رہا ہے , ڈاکٹر نوید ارشد

لاہور میں سینٹر فار ایرو اسپیس اینڈ سیکیورٹی اسٹڈیز نے “پاکستان کی توانائی سلامتی دو ہزار چھبیس: شمسی توانائی کی افادیت اور منتقلی کا جائزہ” کے عنوان سے گول میز مذاکرے کا انعقاد کیا جس میں ماہرین، ماہرین تعلیم اور متعلقہ شعبوں کے نمائندگان نے شرکت کی، تقریب کا آغاز تحقیقی معاون ماہیرا منیر کے افتتاحی خطاب سے ہوا جبکہ مرکزی مقرر ڈاکٹر نوید ارشد ڈائریکٹر انرجی انسٹی ٹیوٹ لمز تھے، انہوں نے کہا کہ پاکستان خاموش توانائی انقلاب سے گزر رہا ہے اور اب ان ممالک کی صف میں شامل ہو چکا ہے جہاں مجموعی بجلی پیداوار کا تقریباً پچیس فیصد شمسی ذرائع سے حاصل ہو رہا ہے، ان کے مطابق پاکستان میں شمسی توانائی کا فروغ زیادہ تر انفرادی سطح پر ہوا ہے جس میں عوامی دلچسپی، فلیٹ چھتیں، زیادہ شمسی شعاعیں اور نیٹ میٹرنگ پالیسی نے اہم کردار ادا کیا، انہوں نے کہا کہ توانائی سلامتی کے حصول کے لیے گھریلو سطح پر بجلی کے استعمال کی مکمل برقی کاری، بیٹری ٹیکنالوجی، بیٹری سپلائی چین اور نئی توانائی ٹیکنالوجیز پر توجہ دینا ضروری ہے، تقریب کے اختتام پر ایئر مارشل ریٹائرڈ عاصم سلیمان صدر سی اے ایس ایس لاہور نے کہا کہ کم ہوتی لاگت اور بڑھتی دلچسپی کے باعث پاکستان میں شمسی توانائی تیزی سے مقبول ہو رہی ہے تاہم اس کے مؤثر انضمام کے لیے توانائی ذخیرہ کرنے کے نظام، اسمارٹ گرڈز اور بہتر پیش گوئی کے نظام میں سرمایہ کاری ناگزیر ہے، انہوں نے زور دیا کہ بہتر حکمرانی اور مالیاتی نظام مستقبل میں توانائی کے پائیدار پھیلاؤ کے لیے کلیدی کردار ادا کریں گے جبکہ شرکاء نے توانائی، مصنوعی ذہانت اور شمسی پینلز کے ماحولیاتی اثرات سمیت مختلف پہلوؤں پر تفصیلی تبادلہ خیال بھی کیا۔