اسلام آباد:
اسلام آباد ہائی کورٹ کے جج جسٹس محسن اختر کیانی نے ریمارکس دیے ہیں کہ جس طرح آبادی بڑھی ہے، اسی طرح این سی سی آئی اے کو پراسیکوٹرز کی تعداد بھی بڑھانی ہوگی۔
افغانستان سے تجارت صرف قانونی طریقے سے ممکن ہے، انوار الحق کاکڑ
اسلام آباد ہائی کورٹ میں این سی سی آئی اے پراسیکوٹرز کی عدم دستیابی کے باعث کیسز میں التوا کے معاملے پر سماعت ہوئی، جس میں ایڈیشنل ڈی جی این سی سی آئی اے عارف شہباز وزیر عدالت کے سامنے پیش ہوئے اور جسٹس محسن اختر کیانی نے کیس کی سماعت کی۔
عدالت نے ایڈیشنل ڈی جی سے استفسار کیا کہ آپ کے پاس کتنے پراسیکوٹرز ہیں، جس پر حکام نے جواب دیا کہ ہمارے پاس 9 پراسیکوٹرز ہیں، اسلام آباد میں ایک ہی پوسٹ ہے جبکہ وفاقی دارالحکومت میں ماہانہ دو سو کیسز رجسٹرڈ ہوتے ہیں۔
جسٹس محسن اختر کیانی نے کہا کہ تمام عدالتوں کو ملا کر 15 ہزار کیسز ہوں گے، ٹرائل کورٹ میں گواہ موجود ہیں اور وکیل موجود ہے لیکن آپ کا پراسیکوٹر موجود نہیں، جس کی وجہ سے ٹرائل آگے نہیں چل رہا۔ پراسیکیوٹر کی عدم موجودگی کی وجہ سے ٹرائل کورٹ میں بیان نہیں لکھا جا رہا۔ جس طرح آبادی بڑھی ہے، اسی طرح آپ کو پراسیکوٹرز کی تعداد بھی بڑھانی ہوگی۔
این سی سی آئی اے حکام نے کہا کہ ہم پراسیکوٹرز کی تعداد بڑھا رہے ہیں اور ڈیپوٹیشن پر بھی لے رہے ہیں۔ جسٹس محسن اختر کیانی نے کہا کہ آپ یہ ہدایات دیں گے کہ جب بیان پراسیکوٹر لکھوا لے تو اس کے بعد مدعی کا وکیل کیس آگے بڑھائے گا۔ این سی سی آئی اے حکام نے عدالت کو بتایا کہ ان کے پاس 367 بلاسفیمی کے کیسز موجود ہیں۔
