وزیرِ اعلیٰ خیبر پختونخوا محمد سُہیل خان آفریدی نے سوشل میڈیا پر ایک کمسن بچے کی تشویشناک حالت کے حوالے سے سامنے آنے والی شکایت کا فوری نوٹس لیا ہے اور اس سلسلے میں لیڈی ریڈنگ اسپتال کے ایمرجنسی چلڈرن وارڈ کا خود دورہ کیا۔ اس موقع پر وزیرِ اعلیٰ نے زیرِ علاج بچے کے اہلِ خانہ سے ملاقات کی اور پورے معاملے کی مکمل انکوائری کی تاکہ حقیقت کا پتہ لگایا جا سکے۔ متعلقہ ڈاکٹروں نے وزیرِ اعلیٰ کو صورتحال سے آگاہ کرتے ہوئے بتایا کہ بچوں کے آئی سی یو میں بیڈز کی کمی ہے، جس کی وجہ سے مریض کو خیبر ٹیچنگ اسپتال منتقل کرنا ضروری ہے کیونکہ وہاں بیڈ دستیاب ہے۔ اس پر وزیرِ اعلیٰ نے فوری طور پر ایمبولینس فراہم کرنے اور مریض کی بروقت منتقلی کو یقینی بنانے کے احکامات جاری کیے۔
مقبوضہ بیت المقدس میں اسرائیل نے اقوام متحدہ کی عمارت مسمار کردی
وزیرِ اعلیٰ نے اسپتال میں بچوں کے آئی سی یو کے لیے نئے بیڈز فراہم کرنے اور وہاں فوری طور پر فیبری کیٹڈ ایکسٹینشن رومز قائم کرنے کی ہدایت کی ہے تاکہ ہنگامی بنیادوں پر مریضوں کے لیے گنجائش میں اضافہ کیا جا سکے۔ انہوں نے یہ بھی واضح کیا کہ اگر کسی بھی سرکاری اسپتال میں بیڈ دستیاب نہ ہو تو مریضوں کے علاج کا بندوبست نجی اسپتالوں میں کیا جائے گا اور اس کے تمام اخراجات خیبر پختونخوا حکومت خود برداشت کرے گی۔ اس فیصلے کا مقصد یہ ہے کہ وسائل کی کمی کی وجہ سے کسی بھی شہری کا علاج متاثر نہ ہو اور انہیں بہترین طبی سہولیات میسر آ سکیں۔
اس کے علاوہ وزیرِ اعلیٰ نے اسپتالوں میں بیڈز کی دستیابی کا بروقت پتہ چلانے کے لیے سنٹرلائزڈ اسپتال سسٹم کو مزید مؤثر بنانے اور پرائمری ہیلتھ کیئر سسٹم کی ازسرِنو بہتری کے لیے اقدامات کرنے کی ہدایت کی ہے۔ انہوں نے ڈاکٹروں کے ہاسٹلز میں کمروں کی کمی کا بھی نوٹس لیا ہے اور متعلقہ حکام کو اس مسئلے کے حل کے لیے فوری احکامات دیے ہیں۔ دورے کے دوران وہاں موجود دیگر مریضوں نے بھی اپنے مسائل سے آگاہ کیا جنہیں موقع پر ہی حل کرنے کے لیے ہدایات جاری کی گئیں۔
وزیرِ اعلیٰ محمد سُہیل خان آفریدی نے اپنے خطاب میں کہا کہ خیبر پختونخوا حکومت ڈاکٹروں اور اساتذہ کی برادری کے ساتھ مکمل طور پر کھڑی ہے اور ان کی فلاح و بہبود اور سہولیات کی فراہمی حکومت کی اولین ترجیحات میں شامل ہے۔ انہوں نے اس عزم کا اعادہ کیا کہ صوبے کے عوام کو صحت کی بہتر سہولیات فراہم کرنے کے لیے تمام دستیاب وسائل بروئے کار لائے جائیں گے اور انتظامی نظام کو مزید بہتر بنایا جائے گا تاکہ عام آدمی کو کسی دشواری کا سامنا نہ کرنا پڑے۔ اس دورے کے دوران وزیرِ اعلیٰ نے ہیلتھ کارڈ اور دیگر سرکاری سہولیات کی فراہمی کے عمل کو بھی مزید شفاف بنانے پر زور دیا۔
