اسلام آباد میں وفاقی تحقیقاتی ادارے ایف آئی اے کے اینٹی ہیومن ٹریفکنگ سرکل نے امریکی سفارتخانے کی نشاندہی پر ایک بڑی کارروائی کرتے ہوئے ویزا فراڈ اور مائیگرنٹ اسمگلنگ میں ملوث گینگ کے دو اہم ملزمان کو گرفتار کر لیا ہے۔ گرفتار ہونے والے ملزمان کی شناخت طاہر شہباز اور رب نواز کے نام سے ہوئی ہے جنہیں وفاقی دارالحکومت کے مختلف علاقوں سے حراست میں لیا گیا ہے۔
ملک بھر کے 40 سیوریج نمونوں میں پولیو وائرس کی تصدیق
ترجمان ایف آئی اے کے مطابق ان ملزمان نے مبینہ طور پر جعلسازی اور دھوکہ دہی کا سہارا لیتے ہوئے بارہ پاکستانی شہریوں کو غیر قانونی طریقے سے امریکہ بھجوانے کی کوشش کی تھی۔ اس گروہ کے خلاف تحقیقات کا آغاز امریکی سفارتخانے کی جانب سے فراہم کردہ معلومات اور نشاندہی کے بعد کیا گیا تھا جس کے نتیجے میں یہ گرفتاریاں عمل میں آئی ہیں۔
ایف آئی اے حکام کا کہنا ہے کہ اس منظم گینگ میں مزید افراد بھی شامل ہیں جو انسانی اسمگلنگ اور سفری دستاویزات کی جعلسازی کے نیٹ ورک کا حصہ ہیں۔ ترجمان نے مزید واضح کیا ہے کہ اس گروہ کے دیگر دو مفرور ساتھیوں کی تلاش جاری ہے اور ان کی گرفتاری کے لیے مختلف مقامات پر چھاپہ مار کارروائیاں کی جا رہی ہیں۔
وفاقی تحقیقاتی ادارے نے ملزمان کے قبضے سے متعلقہ مواد برآمد کر کے تفتیش کا دائرہ وسیع کر دیا ہے تاکہ ویزا فراڈ میں ملوث پورے نیٹ ورک کا خاتمہ کیا جا سکے۔ شہریوں کو غیر قانونی ذرائع سے بیرون ملک بھیجنے کے نام پر لوٹنے والے اس گینگ کے خلاف قانونی چارہ جوئی مکمل کی جائے گی اور تمام ملوث کرداروں کو کیفر کردار تک پہنچایا جائے گا۔
