اسلام آباد (سٹاف رپورٹر)سینیٹر تاج حیدر انچارج سینٹرل الیکشن سیل پاکستان پیپلز پارٹی نے کراچی کے نتائج کے اعلان میں تاخیر پر گہری تشویش ظاہر کرتے ہوئے چیف الیکشن کمشنر سے رابطہ کر لیاہے۔چیف الیکشن کمشنر کو موبائل فون پر بھیجے گئے اپنے پیغام میں سینیٹر تاج حیدر انچارج سینٹرل الیکشن سیل پاکستان پیپلز پارٹی نے کہا ہے کہ کراچی کے نتائج کے اعلان میں تاخیر پر گہری تشویش ہے جہاں ریٹرننگ افسران کے دفاتر پولنگ اسٹیشنوں کے قریب ہیں۔ کراچی نے غیر معمولی دھاندلی اور اونچ نیچ کے ہتھکنڈے دیکھے ہیں جن میں سے زیادہ تر پولنگ کے وقت اور بعد میں کراچی میں انٹرنیٹ کی بندش کی وجہ سے گھنٹوں تک سامنے نہیں آسکے۔ ہمارے امیدواروں کے پاس ان کے خلاف ہونے والی دھاندلی کے چونکا دینے والے ثبوت ہیں۔ نتائج کے اعلان میں تاخیر ہمارے خلاف کارروائیوں میں اضافہ کرتی ہے۔ انتخابی نتائج کا فوری اعلان کیاجائے۔ تاخیر قانون کے تحت زیادہ سے زیادہ سے کہیں زیادہ ہے۔
