**اٹلی نے پاکستان کے لیے تین سال کے لیے 10 ہزار سے زائد نوکریوں کا کوٹہ مختص کیا**
اٹلی نے پاکستان کے لیے اگلے تین سال کے دوران روزگار کے ہزاروں مواقع فراہم کرنے کا اہم فیصلہ کیا ہے۔ وزارت اوورسیز پاکستانیز کے ترجمان کے مطابق، اٹلی نے پاکستان کو **ساڑھے دس ہزار** نوکریوں کا کوٹہ الاٹ کیا ہے، جو یورپ میں پاکستان کے لیے مخصوص لیبر کوٹہ فراہم کرنے والا پہلا ملک بن گیا ہے۔
تفصیلات کے مطابق، ہر سال **3,500** پاکستانی شہری اس اسکیم کے تحت اٹلی روزگار کے لیے جائیں گے۔ ان میں سے **1,500** سیزنل (موسمی) کوٹے پر جبکہ **2,000** نان سیزنل (غیر موسمی) کوٹے پر ہوں گے۔
یہ روزگار کے مواقع مختلف شعبوں میں دستیاب ہوں گے، جن میں شپ بریکنگ، ہیلتھ کیئر، زراعت، ویلڈنگ، ٹیکنیشن، شیف، ویٹرنگ، ہاؤس کیپنگ، نرسنگ، میڈیکل ٹیکنالوجی، فارمنگ اور کاشتکاری شامل ہیں۔
غزہ معاملے پر نیتن یاہو اور ٹرمپ انتظامیہ کے اعلیٰ عہدیداروں کے درمیان کشیدگی میں اضافہ
اسی حوالے سے وفاقی وزیر برائے اوورسیز پاکستانیز **چوہدری سالک حسین** نے کہا کہ یہ پاکستان کے لیے یورپی لیبر مارکیٹ میں روزگار کے نئے مواقع کھولنے کا ایک اہم سنگ میل ہے۔ انہوں نے کہا کہ حکومت پاکستان اپنے محنت کش شہریوں کو عالمی سطح پر باعزت روزگار فراہم کرنے کے لیے پرعزم ہے۔
چوہدری سالک حسین نے مزید کہا کہ اوورسیز پاکستانی دنیا بھر میں پاکستان کے سفیر اور ملکی معیشت کی ریڑھ کی ہڈی کا کردار ادا کر رہے ہیں۔ انہوں نے بتایا کہ فروری میں پاکستان اور اٹلی کے جوائنٹ ورکنگ گروپ کا دوسرا اجلاس اسلام آباد میں منعقد ہوگا۔
یہ اقدام پاکستانی ہنر مند اور نیم ہنر مند افرادی قوت کے لیے یورپ میں روزگار کے نئے دروازے کھولنے کی جانب ایک اہم پیشرفت سمجھی جا رہی ہے۔
